Një tunel 2 mijë vjeçar, i cili dikur u shërbente perandorëve romakë për t’u futur fshehurazi në Koloseum, do të hapet për publikun këtë muaj, duke u ofruar vizitorëve një mundësi unike për të parë prapaskenat perandorake të arenës së famshme.
I njohur si Tuneli i Komodit, korridori 55 metra i gjatë u ndërtua nën amfiteatër për t’i lejuar perandorët dhe të ftuarit e lartë të mbërrinin në tribunën perandorake pa u përzier me turmat.
Tuneli mban emrin e Perandorit Komod, sundimtarit të pamëshirshëm që sundoi nga viti 177 deri në 192 të erës sonë dhe që thuhet se u sulmua për t’u vrarë pikërisht në këtë kalim nëntokësor.
Mundesh me e lexu edhe...
Shikuesit e filmit “Gladiatori” do ta kujtojnë Komodin si personazhin intrigues të luajtur nga Joaquin Phoenix – perandorin që vrau babanë e tij, Mark Aurelin, dhe që u përball në arenë me Maksimusin e interpretuar nga Russell Crowe.
Në realitet, egoja e tij shkoi edhe më larg. Ai merrte pjesë vetë në duele gladiatorësh i veshur si Herkuli, duke luftuar kundër kundërshtarëve të dobësuar dhe madje edhe ndaj kafshëve. Sipas Parkut Arkeologjik të Koloseumit, ai madje i preu kokën një struci përpara turmës brohoritëse.
Korridori i fshehtë u zbulua për herë të parë midis viteve 1810 dhe 1814 nga gërmues francezë nën drejtimin e arkitektit Carlo Lucangeli. Ai u rihap në vitin 1874 dhe u studiuar përsëri në vitet 1990. Gjatë restaurimit të Koloseumit në vitet 2020–2021, arkeologët e hartëzuan plotësisht tunelin dhe nisën një fazë të re konservimi.
Gjatë restaurimit, u zbuluan mure të veshura me mermer, të gdhendura me peizazhe dhe skena mitologjike – përfshirë historinë e Dionisit, perëndisë së verës dhe festës. Pranë hyrjes, janë të dukshme gdhendje që paraqesin gara gjuetie derrash të egër, luftëra arinjsh dhe akrobatë, të cilat kujtojnë spektaklet që dikur mbushnin arenën.
Tuneli tani është i pajisur me ndriçim që rikrijon dritën natyrore përmes dritareve të vjetra të mbyllura, harta taktile për vizitorët me aftësi të kufizuara dhe rekonstruksione me video për të shpjeguar historinë e tij.
Një fazë e re gërmimesh, që pritet të nisë vitin e ardhshëm, synon të zbulojë lidhjen e tunelit – e cila dyshohet se çon drejt kazerma e gladiatorëve (Ludus Magnus)./Albanian Post/Katror.info
