Oda Ekonomike e Kosovës (OEK) i është drejtuar me një kërkesë publike Zyrës së Rregullatorit për Energji (ZRRE), duke kërkuar pezullimin e vendimit që parashikon daljen e bizneseve të mëdha në tregun e lirë të energjisë elektrike më 1 qershor 2025, shkruan Katror.info.
Në letrën e nënshkruar nga kryetari i OEK-ut, Lulzim Rafuna, drejtuar kryesuesit të bordit të ZRRE-së, z. Ymer Fejzullahu, thuhet se “nuk është momenti i favorshëm që bizneset të dalin në tregun e hapur”, dhe vendimi duhet të shtyhet të paktën për një vit.
Pesë arsyet kryesore të kërkesës së OEK-ut janë:
Mundesh me e lexu edhe...
- Bizneset janë njoftuar vetëm në fund të muajit prill për një vendim që hyn në fuqi më 1 qershor, duke i lënë vetëm një muaj kohë për t’u përgatitur.
- Afati përgatitor është i shkurtër dhe i pamjaftueshëm për një hap të tillë strategjik.
- Nuk ka pasur konsultim të duhur me komunitetin e biznesit për të përcaktuar afatin më të përshtatshëm.
- Shumica e furnizuesve në tregun e lirë nuk janë nga Kosova, por të huaj.
- Çmimet e ofruara nga këta furnizues janë 200–300% më të larta krahasuar me ato të deritanishme nga KESCO.
Letra thekson se sektori privat në Kosovë punëson mbi 330 mijë punëtorë, dhe dalja në treg në këto kushte do të shtynte shumë kompani drejt falimentimit për shkak të pamundësisë financiare për të përballuar çmimet aktuale.
“Për pasojë, edhe produkti vendor do të goditet rëndë,” thuhet në dokument. “Prodhimi vendor do ta humbasë konkurrueshmërinë me produktet e importuara, duke rrezikuar edhe më shumë praninë tonë në tregjet evropiane.”
OEK përfundon kërkesën duke u bërë thirrje autoriteteve që të pezullojnë për një periudhë njëvjeçare zbatimin e vendimit për daljen e bizneseve në tregun e lirë të energjisë, për të parandaluar pasoja të mëdha ekonomike dhe rritje të papunësisë./Katror.info
Përgatiti:
