Këshilli Drejtues i Odës së Infermierëve të Kosovës (OIK) ka zhvilluar një vizitë studimore në Kroaci, me synimin për të shkëmbyer përvoja dhe praktika profesionale me Odën Kroate të Infermierisë dhe institucione të tjera të fushës së kujdesit shëndetësor.
Gjatë vizitës në qytetet Zagreb dhe Varazhdin, delegacioni i OIK u njoh nga afër me modelet e avancuara të funksionimit të sistemit infermieror kroat, përfshirë digjitalizimin e proceseve të licencimit, ndarjen e përgjegjësive ndërmjet profesionistëve të shëndetësisë, si dhe opsionet për specializime dhe avancim profesional të infermierëve.
Në kuadër të vizitës u mbajtën takime me përfaqësues të Odës Kroate të Infermierisë, institucioneve shëndetësore dhe akademike, ku u trajtuan çështje kyçe si etika profesionale, njohja e kualifikimeve ndërkombëtare, përcaktimi i çmimeve të shërbimeve infermierore dhe sfidat e përbashkëta që prekin profesionin.
Mundesh me e lexu edhe…
Vizita përfundoi me një tryezë diskutimi mes palëve, ku u shkëmbyen ide konkrete për përmirësimin e kushteve të punës për infermierët dhe për forcimin e bashkëpunimit institucional ndërmjet Kosovës dhe Kroacisë në fushën e infermierisë.
OIK shprehu mirënjohje për mbështetjen e ofruar nga Integrated Health Services (IHS) për një pjesë të delegacionit, duke vlerësuar lart kontributin e tyre në zhvillimin profesional të infermierëve të Kosovës./Katror.info
