Sheshi “Skënderbeu” në Prishtinë u shndërrua në një skenë të hapur operistike, ku mbrëmja gala “Rame Lahaj & Friends” përmbylli me madhështi edicionin jubilar të Rame Lahaj International Opera Festival (RLIOF). Nën qiellin e hapur dhe pranë mijëra pjesëmarrësve, muzika klasike ngjalli emocione të paharrueshme, duke konfirmuar edhe një herë se arti nuk njeh kufij, shkruan Katror.info.
Tenori i njohur Rame Lahaj solli në skenë një repertor të pasur dhe të ndjeshëm, që ndërthurte arie të famshme botërore me këngë të dashura shqiptare. Në këtë natë të veçantë, ai u shoqërua nga yje ndërkombëtarë të operës si sopranoja Nino Machaidze dhe basi Dario Russo, ndërsa dirigjenti italian Roberto Rizzi Brignoli udhëhoqi Orkestrën Simfonike të RTSH në një ekzekutim të përsosur.
Mbrëmja u kurorëzua me ovacione të gjata dhe emocione të fuqishme, ndërsa një nga momentet më të veçanta ishte prezantimi i pullës postare me portretin e Rame Lahajt nga Posta e Kosovës – një nderim simbolik për kontributin e tij të jashtëzakonshëm në promovimin e kulturës operistike.
Mundesh me e lexu edhe…
Në skenë u ngjit edhe ish-kapiteni i Kombëtares së Kosovës, Lorik Cana, i cili prezantoi projektin “Udha” për ruajtjen dhe promovimin e trashëgimisë arbëreshe. Ndërkohë, këngëtarja italiane Angela Dell’Aquila emocionoi publikun me interpretimin e këngës “Moj e bukura More” në një duet të rrallë me Lahajn.
Nën moton “Ëndrra pa kufi, Opera pa mure”, RLIOF dëshmoi për të pestin vit radhazi se arti ka fuqinë të bashkojë njerëz nga kultura dhe gjuhë të ndryshme, të frymëzojë dhe të ndërtojë ura për të ardhmen.
Ky edicion jubilar është një tjetër gur themeli për një të ardhme të qëndrueshme të muzikës klasike në Kosovë. Fondacioni Rame Lahaj premton se do të vazhdojë misionin e tij për të sjellë artin më të mirë ndërkombëtar në vend dhe për të edukuar brezat e rinj me vlerat e artit të mirëfilltë./Katror.info
