Ambasadori i Bashkimit Evropian (BE) në Kosovë, Aivo Orav, ka thënë se shpreson që sa më shpejt të jetë e mundur edhe Kosova të bëhet pjesë e BE-së.
“Shpresa ime e sinqertë është që edhe Kosova të jetë me ne në Bashkimin Evropian sa më shpejt të jetë e mundur”, ka deklaruar ai në hapjen e aktiviteteve me rastin e Ditës së Evropës, të organizuara nga Zyra e Bashkimit Evropian në Kosovë.
Orav ka theksuar rëndësinë e kësaj dite për të reflektuar mbi të arriturat e Bashkimit Evropian dhe për të ndërtuar vizionin për të ardhmen.
Mundesh me e lexu edhe…
Ai ka deklaruar se BE-ja ka qenë projekti më i suksesshëm i paqes në botë, duke kujtuar se që nga themelimi i saj nuk ka pasur asnjë luftë në territorin e unionit, raporton Ekonomia Online.
“Kjo Ditë e Evropës na jep kohën dhe obligimin për të shikuar prapa se çfarë ka bërë deri tani Bashkimi Evropian dhe gjithashtu për të ëndërruar për të ardhmen. Dhe absolutisht më e rëndësishmja për Bashkimin Evropian është që ai ka qenë projekti më i suksesshëm i paqes në botë. Që nga krijimi i tij, asnjë luftë nuk ka ndodhur në territorin e Bashkimit Evropian. Dhe besoj që kjo duhet të jetë edhe ëndrra jonë për të ardhmen, që të vazhdojë gjithmonë në këtë mënyrë. Dhe sigurisht, shpresa ime e sinqertë është që edhe Kosova të jetë me ne në Bashkimin Evropian sa më shpejt të jetë e mundur”, ka deklaruar Orav. /Katror.info
