Presidentja e Republikës së Kosovës, Vjosa Osmani, ka marrë pjesë sot në ceremoninë e certifikimit të rekrutëve të rinj të Forcës së Sigurisë së Kosovës (FSK) në Kazermën “Skënderbeu” në Ferizaj, ku ka theksuar se FSK është dëshmi e sakrificës dhe përkushtimit ndaj atdheut, shkruan Katror.info.
Në fjalën e saj, Presidentja Osmani tha se Kosova është e lirë falë sakrificës së dëshmorëve dhe martirëve, ndërsa e cilësoi ushtrinë jo vetëm si një forcë të armatosur, por edhe si një betim të përhershëm për mbrojtjen dhe sigurinë e vendit.
“Sot është një ditë e veçantë për ju dhe për gjithë Republikën e Kosovës. 344 djem dhe vajza i bashkohen radhëve të FSK-së, duke u bërë pjesë e një misioni të shenjtë – mbrojtjes së atdheut, garantimit të sigurisë dhe mbështetjes së paqes brenda dhe përtej kufijve tanë,” deklaroi Osmani.
Mundesh me e lexu edhe…
Presidentja nënvizoi gjithashtu orientimin e qartë të Kosovës drejt integrimeve euroatlantike, duke theksuar se vendi ka një ushtri të fortë dhe të denjë për të qenë pjesë e strukturave ndërkombëtare të mbrojtjes dhe sigurisë.
“Me profesionalizmin dhe përgatitjen e ushtarakëve tanë, po dëshmojmë se Kosova është e gatshme të kontribuojë për paqen dhe stabilitetin global,” tha ajo.
Ceremonia e certifikimit të rekrutëve të rinj të FSK-së u mbajt në një atmosferë solemne, duke konfirmuar përkushtimin e Kosovës për ndërtimin e një force të sigurisë profesionale dhe të gatshme për të përmbushur detyrimet e saj në nivel kombëtar dhe ndërkombëtar./Katror.info
Përgatiti:
