Presidentja e Kosovës, Vjosa Osmani, ka shprehur mirënjohje të thellë për artistët dhe organizatorët e koncertit “Kanga jonë 2025 – Të fala nga Prishtina”, një ngjarje kulturore madhështore që u mbajt në kuadër të shënimit të 26-vjetorit të çlirimit të Kosovës dhe përmbylli me dinjitet Forumin Ndërkombëtar WPS, shkruan Katror.info.
Koncerti, i cili u përqendrua në trashëgiminë muzikore shqiptare, i kushtohej veprës së kompozitorit të shquar Musa Piperku. Në nderim të kontributit të tij të jashtëzakonshëm në muzikën shqipe, Presidentja Osmani i ndau Medaljen Presidenciale të Meritave, post mortem.
“Një mbrëmje e paharrueshme, në nderim të një artisti që me veprat e tij pasuroi jetën tonë kulturore dhe la gjurmë të thella në muzikën shqiptare,” u shpreh Osmani, duke theksuar nevojën për ruajtjen dhe promovimin e kulturës kombëtare./Katror.info
