Presidentja e Republikës së Kosovës, Vjosa Osmani, ka nisur një vizitë zyrtare në Finlandë, e cila do të fillojë me një ceremoni zyrtare në Pallatin Presidencial në Helsinki. Pas ceremonisë, Osmani dhe Presidenti finlandez, Alexander Stubb, do të zhvillojnë një takim ballë për ballë, i cili do të pasohet nga një takim ndërmjet delegacioneve të të dyja shteteve.
Gjatë qëndrimit në Helsinki, Presidenti Stubb do të organizojë një drekë zyrtare në nder të Presidentes Osmani dhe delegacionit të saj. Në kuadër të kësaj vizite, Presidentja Osmani do t’ua ndajë Medaljen Presidenciale Ushtarake Forcave të Armatosura të Finlandës, si shenjë falënderimi për kontributin e tyre në ruajtjen e paqes dhe sigurisë në Kosovë, në kuadër të misionit të NATO-s, KFOR.
Vizita do të përfshijë gjithashtu takime të nivelit të lartë me zyrtarë të lartë finlandezë, përfshirë kryetarin e Parlamentit të Finlandës, Jussi Halla-aho, dhe ministren e Jashtme, znj. Elina Valtonen.
Mundesh me e lexu edhe…
Në agjendën e vizitës përfshihet edhe një diskutim publik në Universitetin e Helsinkit, ku Presidentja Osmani do të mbajë një fjalim me temën “Vizioni i Kosovës për integrimin evropian, paqen dhe stabilitetin”. Ajo do të shpalosë para studentëve, profesorëve dhe diplomatëve vizionin dhe prioritetet strategjike të Kosovës në arenën ndërkombëtare.
Gjatë vizitës, Presidentja Osmani do të zhvillojë edhe një takim me përfaqësues të mërgatës kosovare në Finlandë, për të bashkëbiseduar rreth zhvillimeve më të fundit në vend dhe për të shprehur mirënjohjen për rolin e tyre në fuqizimin e Kosovës jashtë vendit./Katror.info
Përgatiti:
