Presidentja e Kosovës, Vjosa Osmani, ka udhëtuar për në Hungari, ku do të marrë pjesë në Samitin e liderëve të Komunitetit Politik Evropian.
Kështu ka bërë të ditur Presidenca e Kosovës nëpërmjet një komunikate për media të publikuar në rrjetin social Facebook, ku theksohet se takimi i radhës i Komunitetit Politik Evropian do të mbledhë liderë nga 47 shtete nga i gjithë kontinenti, në Budapest.
“Në këtë Samit, Presidentja Osmani bashkë me liderët e tjerë do të diskutojnë mbi sfidat e sigurisë në Evropë, të shkaktuara nga lufta në Ukrainë, përshkallëzimin e krizës në Lindjen e Mesme, sfidat e migracionit dhe ato ekonomike”, thuhet në komunikatë.
Mundesh me e lexu edhe…
Siç njoftohet, Osmani do të marrë pjesë në dy sesionet plenare të Komunitetit Politik Evropian, si dhe do të mbajë dy fjalime, njërin në seancë plenare dhe tjetrin në tryezën punuese për sigurinë ekonomike.
Në kuadër të Samitit, ajo do të zhvillojë takime bilaterale me liderë të tjerë evropianë.
Përpos kësaj, e para e shtetit atje pritet se do të zhvillojë një takim edhe me mërgatën shqiptare.
Komuniteti Politik Evropian potencohet se është një platformë për liderët evropianë për të diskutuar çështjet kyçe me të cilat përballet kontinenti, nga siguria dhe migrimi te stabiliteti ekonomik dhe mjedisi.
Kjo ngjarje e nisur në vitin 2022, synon të forcojë lidhjet politike dhe ekonomike në të gjithë Evropën, të ofrojë zgjidhje për sfidat e përbashkëta dhe ta thellojë bashkëpunimin midis vendeve të BE-së dhe jashtë saj./Katror.info
Përgatiti:
