E përditësuar – 10:28
Presidentja e Kosovës, Vjosa Osmani, i ka propozuar të mërkurën sekretarit të Jashtëm të Mbretërisë së Bashkuar, David Lammy, lidhjen e një marrëveshjeje për bashkëpunim në fushën e mbrojtjes dhe ekonomisë mes dy vendeve.
Lammy po qëndron në Kosovë për një vizitë zyrtare, si pjesë e një turneu në Ballkanin Perëndimor, që, sipas Qeverisë së Mbretërisë së Bashkuar, synon forcimin e bashkëpunimit në luftën kundër imigracionit të parregullt dhe krimit të organizuar.
Mundesh me e lexu edhe…
Në një konferencë të përbashkët për media, Osmani tha se me kryediplomatin britanik ka diskutuar për “thellimin strategjik të bashkëpunimit” mes Kosovës dhe Britanisë së Madhe, me fokus të veçantë në mbrojtje dhe ekonomi. Ajo bëri të ditur se bisedimet me Lammyn kanë qenë të gjera dhe se ai ka mirëpritur idenë e forcimit të këtij bashkëpunimi.
Një nga temat kryesore të diskutimit, sipas Osmanit, ishte procesi i dialogut me Serbinë. Ajo theksoi se Kosova mbetet një palë konstruktive, pavarësisht provokimeve të vazhdueshme nga Serbia, përfshirë sulmet e viteve të fundit.
Osmani gjithashtu nënvizoi nevojën për llogaridhënie dhe kërkoi që autorët e sulmeve të përballen me drejtësinë. “Fatkeqësisht, nuk ka asnjë lëvizje nga Serbia për të dhënë llogari, as për aktin e agresionit të shtatorit 2023, as për sulmet ndaj ushtarëve të NATO-s dhe as për veprimet e fundit terroriste në veri të Kosovës,” tha ajo.
Presidentja falënderoi Mbretërinë e Bashkuar për mbështetjen e vazhdueshme ndaj Kosovës, veçanërisht në rrugën euroatlantike dhe anëtarësimin në Këshillin e Evropës.
Nga ana e tij, Lammy theksoi se Ballkani mbetet një rajon i rëndësishëm për Britaninë e Madhe, ashtu siç ka qenë gjatë qeverisjes së Tony Blair. Ai siguroi se Britania do të vazhdojë të luajë rolin e një mikes dhe partneres kyçe për Kosovën.
Kryediplomati britanik theksoi gjithashtu rëndësinë e një “normalizimi të qëndrueshëm dhe paqësor” mes Kosovës dhe Serbisë, duke bërë thirrje që Kosova të angazhohet me seriozitet në dialogun e ndërmjetësuar nga Bashkimi Evropian.
Osmani, nga ana e saj, konfirmoi se Kosova mirëpret angazhimin britanik në çështjet e mbrojtjes dhe eksportit të armëve, duke theksuar se ky bashkëpunim do të kontribuojë si në forcimin e sigurisë së Kosovës, ashtu edhe në avancimin e industrisë së mbrojtjes së Britanisë së Madhe.
***
Presidentja e Kosovës, Vjosa Osmani, ka pritur sot në takim sekretarin e jashtëm të Mbretërisë së Bashkuar, David Lammy. Takimi po mbahet në ambientet e Presidencës së Kosovës, shkruan Katror.info.
Ky takim vjen në kuadër të bashkëpunimit të vazhdueshëm ndërmjet Kosovës dhe Mbretërisë së Bashkuar, një prej aleatëve më të rëndësishëm të vendit në arenën ndërkombëtare.
Temat kryesore të diskutimit pritet të jenë forcimi i marrëdhënieve dypalëshe, mbështetja e vazhdueshme britanike për Kosovën dhe çështjet e sigurisë rajonale.
Pas përfundimit të takimit, pritet të mbahet një konferencë për media, ku Presidentja Osmani dhe Sekretari Lammy do të ndajnë detaje mbi diskutimet dhe rezultatet e takimit./Katror.info
Përgatiti:
