Shkurti i 2007-ës nuk ka qenë ndër ato shkurtet e ftohta, ku temperaturat janë nën 0. Në fakt, për kosovarët shkurtet e viteve 2007-2008, ruajnë ngrohtësinë më të madhe në zemrat tona. E krejt kjo falë një personi që avokonte e luftonte për liritë e pavarësitë e popujve të vogla.
Atë botë, më 2 shkurt 2007, i dërguari special për statusin e Kosovës, si dhe njëri ndër vulëdhënësit e rrugëtimit të pavarësisë së Kosovës, Martti Ahtisaari, bëri hapin e parë drejt krijimit të shtetit të pavarur të Kosovës, duke dorëzuar propozimin e tij në Prishtinë dhe Beograd.
Sipas Ahtissarit dhe ekipit të tij, synimi i propozimit të gjithanshëm për marrëveshjen mbi statusin e Kosovës ishte të përcaktojë kërkesat e nevojshme për një Kosovë të ardhshme që është e mundshme, e qëndrueshme dhe e stabilizuar.
Mundesh me e lexu edhe...
Plani përfshinte masa të hollësishme për të siguruar inkurajimin dhe mbrojtjen e të drejtave të bashkësive dhe anëtarëve të tyre, decentralizimin efektiv të qeverisë dhe ruajtjen e mbrojtjen e trashëgimisë kulturore e fetare.
Për më tepër, marrëveshja përshkruante masa kushtetuese, ekonomike dhe sigurie, të cilat së bashku synonin të kontribuojnë në zhvillimin e një Kosove shumë-etnike dhe demokratike.
Më 26 mars, Ahtisari ia dorëzoi sekretarit të përgjithshëm të Kombeve të Bashkuara raportin final dhe rekomandimin që Kosova të fitojë një pavarësi të mbikëqyrur.
Me planin që ai hartoi, u shpall edhe pavarësia e Kosovës më 17 shkurt 2008.
Sot, në një ditë të ftohtë mes-vjeshte, ne zgjohemi me lajmin se miku dhe nismëtari i pavarësisë së Kosovës, ish-presidenti i Finlandës, Martti Ahtisaari ka ndërruar jetë në moshën 86-vjeçare në Helsinki, sipas Presidencës finlandeze.
Këtij njeriu, një popull i vogël, diku në mes të Ballkanit Perendimor do t’i jetë përherë falenderues dhe do ta mbajë gjatë në kujtesë kontributin dhe vullnetin që dha për Kosovën dhe për të drejtat e qytetarëve të saj, dhe jo vetëm.
Si rrjedhojë e besimit të tij në paqe dhe pikëpamjeve se konfliktet nuk janë zgjidhje, ai u shpërblye me Çmimin Nobel për Paqe më 2008 për kontributin për dhënien fund të konflikteve edhe në Indonezi, Namibi apo Irlandën Veriore.
Ahtisaari kishte refuzuar të pranonte se luftërat dhe konfliktet ishin të pashmangshme.
“Paqja është çështje e vullnetit. Të gjitha konfliktet mund të zgjidhen dhe nuk ka asnjë justifikim që t’i lejojmë që ato të bëhen të përjetshme”, kishte deklaruar Ahtisaari gjatë pranimit të Nobelit më 2008.
Ahtisaari ishte tërhequr nga jeta publike dhe politike më 2021, pasi u diagnostikua me sëmundjen e Allzajmerit.
Ai ishte president i Finlandës nga viti 1994 deri më 2000.
Për vdekjen e Martti Ahtisaarit kanë shkruar shumë figura të fushës shoqërore e politike në Kosovë, duke shprehur mirënjohjet maksimale për mikun e madh të Kosovës.
Ndër ta ishte edhe reagimi i Ish-ministrit të jashtëm të Kosovës Petrot Selimi, i cili ndau një anekdotë të preferuar të Ahtisaarit.
“Kur Ahtisaari u pyet nëse Serbia duhet të mbajë njëfarë sovraniteti mbi Kosovën- “Nëse një hajdut vjedh portofolin tuaj, ju nuk kërkoni gjysmën e parave, ju dëshironi që portofolin tuaj të kthehet dhe hajduti të dënohet”, do të thotë Serbia humbi çdo të drejtë për shkak të kriminalitetit të veprave të kaluara”, ka shkruar Selimi./Katror.info
Përgatiti:
