Partia Demokratike e Kosovës (PDK) ka mbajtur sot mbledhjen e rregullt të Kryesisë për të diskutuar zhvillimet e fundit politike në vend, duke ngritur shqetësimin për bllokadën institucionale dhe duke kërkuar formimin e një qeverie të re.
Në komunikatën e publikuar pas mbledhjes, PDK vlerëson se Kosova po kalon një krizë të thellë institucionale, për të cilën fajëson koalicionin fitues të zgjedhjeve të 9 shkurtit. Sipas tyre, ky koalicion, ndonëse ka dalë i pari, nuk ka shumicën parlamentare dhe po e mban peng vendin. “Çdo iniciativë që synon zgjidhjen e bllokadës, meriton të dëgjohet dhe diskutohet,” thuhet në deklaratë, raporton Katror.info.
PDK njofton se ka zhvilluar takime me të gjitha partitë parlamentare, përfshirë edhe Lëvizjen Vetëvendosje, për të diskutuar daljen nga kriza. “Ky angazhim është shprehje e bindjes sonë se dialogu dhe bashkëpunimi janë rruga e vetme për të dalë nga krizat politike dhe për të rikthyer normalitetin institucional.”
Mundesh me e lexu edhe…
Në këtë kontekst, PDK i bën thirrje Presidentes së Republikës që të ndërmarrë hapat për thirrjen e një tryeze gjithëpërfshirëse me të gjitha subjektet politike parlamentare. Sipas partisë, një takim i tillë do të mundësonte gjetjen e një rruge të përbashkët për dalje nga ngërçi institucional.
PDK propozon formimin e një qeverie të re të përbërë nga partitë që më parë ishin në opozitë, e cila do të synonte ndaljen e degradimit institucional dhe do ta kthente Kosovën në rrugën e zhvillimit dhe të integrimit euroatlantik. Partia zotohet se një qeveri e tillë do të përqendrohej në politika për të gjithë qytetarët, pa dallim, dhe do të punonte mbi një listë të dakorduar të prioriteteve shtetërore.
Në fund, PDK i bën thirrje koalicionit VV – GUXO – Alternativa që të “mos abuzojë me të drejtën kushtetuese për propozimin e kandidatit për Kryetar të Kuvendit” dhe të reflektojë mbi realitetin politik aktual.
“Kosova ka nevojë për institucione funksionale sa më parë. PDK mbetet e angazhuar për të dhënë kontributin e saj në një proces demokratik dhe kushtetues që çon drejt zgjidhjes. Kosova meriton ma shumë. Kosova mundet ma mirë!” përfundon deklarata./Katror.info
