Hanit të Elezit i është rikthyer gjallëria kulturore me një aktivitet që i kishte munguar për një kohë të gjatë.
Për herë të parë u mbajt Festivali Ndërkombëtar Kulturor ‘CrossRoads Festival’, duke sjellë performancë, punëtori dhe art ndërkombëtar, kryesisht për të rinjtë e qytetit, – shkruan Katror.info.
Me moton ‘Where Ends Meet’, ngjarja synon të sensibilizojë komunitetin, të hapë horizonte të reja dhe të krijohet një hapësirë ku kultura bëhet e prekshme për të gjithë.
Mundesh me e lexu edhe…
“Festivali është më shumë civilizues, një lloj balanci i mendësive evropiane, gjithandej Kosovës, të komunave që janë më të ngritura në aspektin e kulturës dhe artit, ne kemi mendu që edhe në Han të Elezit duhet të organizojmë diçka të tillë” – tha Mehmet Ballazhi, Kryetar i Hanit të Elezit.
Festivali nisi nga dëshira e dy të rinjve, të cilët panë nevojën për një frymë të re artistike dhe krijuese për brezat e rinj në këtë komunë të vogël.
“Ideja ka qenë gjithmonë që në Han të Elezit me bo diçka, duke e ditë që këtu jam lind, këtu jam rritë. Bashkë me Zana Durakun e cila është drejtoresha e organizatës OJQ Dua dhe producente ekzekutive e festivalit, kemi pas një premierë të një shfaqjeje këtu për herë të parë dhe duke i pa kërkesat e qytetit, mundësitë që qyteti i ka, që mundet me bo ma mirë, na ka lind ideja me bo një festival kulturor, inovativ” – u shpreh Armend Ballazhii, Drejtor Gjeneral i Festivalit.
Ndër aktivitetet e shumta ishte edhe punëtoria artistike e quajtur “UNË, KËTU, TANI”, nga trajnerja italiane Brianda Carreras, me fëmijët që shfaqën interes dhe entuziazëm gjatë gjithë kohës.
“Po ndihem shumë mirë këtu, me qytetin dhe gjithçka tjetër. Punëtoria ka të bëjë me lëvizjen, se si përmes lëvizjes ne mendojmë çka është identiteti, çka është liria dhe transformimi përmes trupit” – spjegon ajo.
Pjesëmarrja aktive në këto punëtori kontribuoi në krijimin e një atmosfere pozitive dhe kreative.
Nën udhëheqjen e Meli Qenës, figurë e respektuar në skenën teatrore në Kosovë, në punëtorinë “Duart Flasin” fëmijët patën mundësinë unike të eksplorojnë shprehjen përmes gjuhës së trupit.
Gjatë mesditës, fëmijët u shoqëruan nga dyshja spanjolle ‘DUO MIME’ me rolin e tyre në një teatër rruge.
Pas një dite energjike, eventi u kthye në një mbrëmje të ngrohtë dhe festive. Në Memorialin ‘Bllaca 99’ ceremonia e hapjes mblodhi një numër të madh pjesëmarrësish.
Performanca emocionuese e korit “Siparantum” solli gjallëri e energji tek publiku duke krijuar një përvojë të paharrueshme. Ndërsa instalacioni i dritës nga artisti multimedial Florian Çanga, përçoi një mbrëmje plot ngjyra për të gjithë të pranishmit.
Një fjalë përshëndetëse mbajti edhe përfaqësuesi i sponsorit general SharrCem, duke theksuar rëndësinë e mbështetjes për ngjarje që fuqizojnë kulturën dhe bashkëpunimin lokal.
“Kam nderin dhe kënaqësinë të jem në këtë hapje solemne të festivalit CrossRoad, një festival që nuk njeh kufi, ku i shndërron ato në ura lidhëse mes njerëzve, kulturave dhe ideve” – u shpreh Behar Disha, drejtor i përgjithshëm i ‘SharrCem’.
CrossRoads Festival do të vazhdojë edhe për dy ditë të tjera, me aktivitete të reja si ecje në natyrë, punëtori me tema të ndryshme dhe muzikë nga figura të rëndësishme të skenës artistike./Katror.info.
