Pas më shumë se një muaji pune intensive në disa lokacione të ndryshme në Kosovë, Shqipëri dhe Maqedoninë e Veriut, ka përfunduar zyrtarisht faza e xhirimeve të projektit filmik “Jerẽm”, me skenar dhe regji nga regjisori i njohur Ismet Sijarina, shkruan Katror.info.
Ky projekt kinematografik është realizuar nga kompania kosovare Thumbs Up, në bashkëprodhim me Tunnel Film nga Shqipëria dhe DMF doo Production nga Maqedonia e Veriut.
Në kastën e aktorëve përfshihen emra të njohur të kinemasë shqiptare dhe rajonale si: Luli Bitri, Genc Jakupi, Gresa Pallaska, Adem Karaga, Hazir Sh. Haziri, Irena Cahani, Refet Abazi, Jonida Vokshi, Basri Lushtaku, Ema Andrea, Edon Rizvanolli, Suela Bako, Besnik Krapi, Xhevdet Jashari, Afrim Mucaj, Anila Krasniqi, Shpetim Kastrati, Bes Bitraku, Guri Sijarina dhe Arben Bajgora.
Mundesh me e lexu edhe…
Xhirimet janë zhvilluar në disa peizazhe tërheqëse dhe simbolike si: Novo Bërdë, Brezovicë, Përmet, Shëngjin, Llabjan dhe Stanterg, duke i dhënë filmit një karakter vizual të veçantë dhe autentik.
Ekipi ka shprehur mirënjohje të veçantë për të gjithë pjesëtarët kreativë dhe teknikë për përkushtimin dhe angazhimin maksimal gjatë gjithë këtij procesi. Një falënderim i veçantë është shprehur edhe për mbështetësit financiarë që bënë të mundur realizimin e këtij projekti ambicioz./Katror.info
