Përfaqësuesi i ri i Bashkimit Evropian për Dialogun, Peter Sorensen, ka nisur vizitën e tij në Kosovë, ku sot është pritur nga Presidentja Vjosa Osmani, shkruan Katror.info.
Gjatë takimit, diskutimi u fokusua në procesin e dialogut Kosovë-Serbi të lehtësuar nga BE-ja, sigurinë rajonale dhe perspektivën evropiane të Kosovës. Osmani theksoi rëndësinë e stabilitetit politik pas zgjedhjeve parlamentare të 9 shkurtit 2025 dhe nevojën për konstituimin e institucioneve sa më parë për të avancuar reformat kyçe për integrimin në BE.
Sa i përket dialogut me Serbinë, Presidentja Osmani ritheksoi përkushtimin e Kosovës ndaj procesit, duke insistuar në një zbatim të plotë dhe të balancuar të marrëveshjeve të arritura. Ajo gjithashtu paraqiti vërejtjet e Kosovës për Draftstatutin e Asociacionit të propozuar nga BE-ja, duke theksuar se këto çështje duhet të trajtohen me seriozitet për të mos rrezikuar funksionalitetin e shtetit.
Në aspektin e integrimit ndërkombëtar, Osmani kërkoi avancimin e Kosovës drejt anëtarësimit në Këshillin e Evropës dhe organizata të tjera ndërkombëtare, duke denoncuar shkeljet e Serbisë ndaj marrëveshjeve të arritura, përfshirë atë të shkurtit 2023.
Duke folur për perspektivën evropiane, Osmani theksoi nevojën që Kosovës t’i jepet statusi i kandidatit për BE dhe që procesi i zgjerimit në Ballkanin Perëndimor të përshpejtohet bazuar në parimin e meritokracisë. Ajo po ashtu kërkoi heqjen e masave të vendosura nga BE-ja ndaj Kosovës në qershor 2023, duke argumentuar se këto masa po dëmtojnë qytetarët dhe balancën e nevojshme në dialog.
“Kosova është dëshmuar tashmë si palë konstruktive në dialog, e angazhuar për paqe, demokraci e sundim të ligjit, prandaj mbajtja e masave të padrejta të BE-së ndaj vendit tonë po i dëmton jo vetëm qytetarët tanë, por edhe balansin e nevojshëm në dialog”, deklaroi Osmani.
Gjatë takimit, u diskutua gjithashtu roli i NATO-s në ruajtjen e paqes dhe sigurisë në Kosovë, si dhe bashkëpunimi me EULEX-in në fushën e sigurisë dhe sundimit të ligjit.
Më vonë gjatë ditës, Sorensen do të takohet edhe me kryeministrin në detyrë, Albin Kurti, dhe zëvendëskryeministrin në detyrë, Besnik Bislimi. Qëllimi i vizitës së tij është përgatitja për vazhdimin e dialogut Kosovë-Serbi, i cili ka stagnuar për muaj të tërë.
Një nga çështjet që pritet të diskutohet është zbatimi i Deklaratës për të Pagjeturit, për të cilën palët kishin rënë dakord më herët, por nuk ka shënuar ndonjë përparim konkret.
Ndërkohë, Përfaqësuesja e Lartë e BE-së për Politikë të Jashtme dhe Siguri, Kaja Kallas, ka deklaruar se gjatë këtij muaji do të shqyrtohen mundësitë për të avancuar dialogun, duke përmendur edhe kritikat për formatin aktual të procesit.
/Katror.info
Përgatiti:
