Pianistja e njohur kosovare, Pranvera Hoxha, ka lansuar platformën Pianoteka Shqiptare, dedikuar promovimit të krijimtarisë pianistike shqiptare nga kompozitorë të Kosovës dhe Shqipërisë, shkruan Katror.info.
“Qëllimi i kësaj platforme është të ofrojë hapësirë për të zbuluar, promovuar dhe ruajtur pasurinë muzikore të pianizmit shqiptar, si dhe të kontribuojë në edukimin dhe ndërgjegjësimin e brezave të rinj për këtë trashëgimi të çmuar,” ka shkruar Hoxha në Facebook.
Kjo ide është mbështetur nga MKRS dhe aktualisht në kanal janë publikuar 6 video me informacione mbi jetën dhe krijimtarinë e kompozitorit Tonin Harapi.
Mundesh me e lexu edhe…
“Sigurisht që përmbajtja do të pasurohet vazhdimisht me materiale të reja nga krijimtaria pianistike e kompozitorëve nga Kosova dhe Shqipëria. Duke qenë se kanali ka karakter edukativ, ftoj të gjithë kolegët pianistë, studentët dhe nxënësit që ta përdorin si mjet pedagogjik në mësimdhënie dhe mësimnxënie,” ka shkruar Hoxha.
“Një falënderim të veçantë ia adresoj kolegut tim, Avni Krasniqi, për bashkëpunimin e shkëlqyer. Shpresoj që në bashkëpunim me shumë kolegë të tjerë, ta pasurojmë këtë kanal dhe ta bëjmë një pikë referimi për të gjithë nxënësit e muzikës,” shkruan Hoxha./Katror.info
Përgatiti:
