Një pikturë e gjetur nga një tregtar ndërsa po pastronte bodrumin e një shtëpie në Capri, është një portret origjinal nga Pablo Picasso.
Të paktën kështu kanë deklaruar ekspertët italianë.
Pas zbulimit të pikturës në vitin 1962, Luigi Lo Rosso e çoi kanavacën në shtëpi në Pompeii, ku ajo qëndroi e varur në një kornizë të lirë në murin e dhomës së ndenjës për disa dekada.
Mundesh me e lexu edhe...
Portreti, i cili tani besohet nga pronarët e tij si një imazh i deformuar i Dora Maar, një fotografë dhe piktore franceze që ishte muza e Picasso-s, kishte firmën karakteristike të artistit në këndin e majtë të sipërm, shkruan The Guardian, përcjell Albanian Post.
Por Lo Rosso nuk dinte se kush ishte.
Vetëm shumë më vonë, kur djali i tij Andrea filloi të bënte pyetje pas studimit të një enciklopedie të historisë së artit që ia kishte dhënë tezja e tij, dyshimet u ngritën.
Familja përfundimisht kërkoi këshillën e një ekipi ekspertësh, përfshirë një detektiv arti të njohur, Maurizio Seracini.
Pas viteve të hetimeve komplekse, Cinzia Altieri, anëtare e komitetit shkencor të Fondacionit Arcadia, i cili merret me vlerësimin, restaurimin dhe atribuimin e veprave artistike, konfirmoi se firma në pikturë, e cila tani vlerësohet në 6 milionë euro, ishte e Picasso-s.
Picasso ishte një vizitor i shpeshtë në ishullin jugor italian të Caprit dhe piktura, e cila është befasisht e ngjashme me “Buste de femme (Dora Maar)”, besohet të jetë prodhuar midis viteve 1930 dhe 1936.
Lo Rosso ka ndërruar jetë, por djali i tij Andrea, tani 60 vjeç, vazhdoi kërkimin e tij për të zbuluar artistin pas pikturës.
Picasso, i cili vdiq në vitin 1973, prodhoi më shumë se 14 mijë vepra dhe fondacioni merr qindra mesazhe në ditë nga njerëz që pretendojnë se kanë në posedim një origjinal.
“Buste de femme (Dora Maar)” u pikturua në vitin 1938 dhe u vodh nga jahti i një sheiku saudit në vitin 1999 para se të gjendej 20 vjet më vonë./AP/Katror.info
Përgatiti:
