Policia e Kosovës ka njoftuar se më 10 dhe 11 mars do të bëjë ndërprerje të përkohshme të trafikut në disa segmente rrugore, për shkak të vizitës në Kosovë të Sekretarit të Përgjithshëm të NATO-s, Mark Rutte, shkruan Katror.info.
Sipas një komunikate për media, ndërprerjet do të ndodhin në intervale të shkurtra kohore në rrugët ku do të kalojë eskorta, si dhe në afërsi të objekteve shtetërore, ku trafiku do të riorientohet në rrugë alternative. Policia ka kërkuar mirëkuptim nga qytetarët dhe pjesëmarrësit në trafik.
Gjatë vizitës së tij në Kosovë, Rutte do të takohet me kryeministrin Albin Kurti dhe presidenten Vjosa Osmani. Vizita e tij vjen pak javë pas përfundimit të procesit zgjedhor në vend, ndërsa më herët ai kishte deklaruar se pret formimin e një qeverie stabile dhe funksionale sa më shpejt që të jetë e mundur.
Mundesh me e lexu edhe…
Rutte ka theksuar rëndësinë e stabilitetit në Kosovë, Bosnjë-Hercegovinë dhe Serbi, duke shtuar se nuk sheh arsye për ndryshime të theksuara në angazhimin e Shteteve të Bashkuara në NATO.
Stabiliteti në rajonin e Ballkanit Perëndimor ka qenë një çështje kyçe në diskutimet ndërkombëtare për dekada, për shkak të tensioneve mes Kosovës dhe Serbisë. Aktualisht, NATO ka mbi 4 mijë trupa të dislokuara në Kosovë./Katror.info
Përgatiti:
