Më 12 shkurt 2025, Posta e Kosovës, përmes Filatelisë së saj, lëshon në qarkullim një emision të ri të pullave postare në nderim të 80-vjetorit të gazetës “Rilindja”, medies së parë të shkruar në Kosovë. Ky emision përfaqëson një homazh për kontributin e gazetarëve, redaktorëve dhe punonjësve që e bënë të mundur botimin dhe zhvillimin e kësaj gazete historike, shkruan Katror.info.
E themeluar më 12 shkurt 1945, “Rilindja” u bë një zë i fuqishëm i shqiptarëve të Kosovës, duke pasqyruar realitetin e kohës dhe duke ndihmuar në ruajtjen e gjuhës dhe identitetit kombëtar. Botimi i numrit të parë kërkoi përkushtim dhe punë të jashtëzakonshme, ku shkronjat shqipe u punuan manualisht për të siguruar që gazeta të arrinte tek lexuesit.
Përveç rolit të saj informativ, “Rilindja” u shndërrua në një shtysë të rëndësishme për zhvillimin arsimor dhe kulturor, duke udhëhequr fushata kundër analfabetizmit dhe duke promovuar arsimin e grave. Me bartjen e shtypshkronjës në Prishtinë në vitin 1958, gazeta nisi botimin ditor, duke forcuar ndikimin e saj në shoqëri.
Mundesh me e lexu edhe…
Në vitin 1990, si pasojë e masave të dhunshme të regjimit serb, “Rilindja” u mbyll, duke lënë një boshllëk të madh në informimin e publikut. Megjithatë, gazetarët e saj nuk u ndalën, duke vazhduar punën përmes gazetës “Bujku”, e cila u bë një dritare informimi në periudhën e errët të represionit.
Kontributi i “Rilindjes” në mbrojtjen e lirisë së shprehjes dhe në zhvillimin e demokracisë është i paçmueshëm. Ky përvjetor shërben si një moment reflektimi mbi ndikimin e saj dhe si një thirrje për të ruajtur vlerat e gazetarisë së pavarur dhe të fjalës së lirë në Kosovë./Katror.info
Përgatiti:
