Posta e Kosovës ka shënuar sot Ditën Botërore të Fotografisë përmes lansimit të një emisioni të ri të pullave postare, duke nderuar trashëgiminë vizuale dhe pasionin për fotografinë në vend, shkruan Katror.info.
Sipas njoftimit të Postës, fotografia ka qenë një formë shprehjeje dhe dokumentimi që ka preokupuar për dekada krijuesit kosovarë. “Që nga çasti kur drita dhe hija filluan të rrëfejnë përmes objektivit, kjo formë shprehjeje u bë mjet dokumentimi, dëshmie dhe interpretimi. Edhe pse fotografitë e para të qyteteve tona u shkrepën nga vizitorë të huaj si Josef Székely e Auguste Leon, shumë shpejt fotografia u përqafua nga vetë krijuesit vendorë”, njofton Posta e Kosovës.
Në historinë e fotografisë kosovare veçohen emra si Ahmet Zherka në Gjakovë, familjet Koro dhe Mjeda në Prizren, si dhe Marubi, i cili mbetet simbol i pasionit për fotografinë në trevat shqiptare. Ky brez pionierësh e ka kthyer fotografinë nga një mrekulli teknologjike në dëshmitare të kohës, duke lënë një trashëgimi të çmuar të ruajtur sot në Fototekën e Arkivit të Kosovës.
Mundesh me e lexu edhe…
Pamjet e dy pullave postare dhe bllokut filatelik janë siguruar me përkrahjen e Arkivit Qendror pranë Agjencisë Shtetërore të Arkivave të Kosovës, ndërsa për Zarfin e Ditës së Parë ka kontribuar studio Zherka në Gjakovë. Emisioni i ri i pullave do të mbetet në qarkullim deri në konsumim të plotë.
Posta e Kosovës i fton koleksionistët, bizneset dhe qytetarët t’i blejnë këto pulla, të cilat jo vetëm pasurojnë koleksionet personale, por ofrojnë edhe vlerë të shtuar kulturore dhe historike./Katror.info
