Nga data 18 shkurt 2025, kandidatët që synojnë të pajisen me patentë shoferi në Kosovë do të përballen me një format të ri testimi teorik. Ministria e Infrastrukturës ka ndërmarrë këtë ndryshim me qëllim të lehtësimit të procesit për kandidatët, duke e bërë testimin më të qartë dhe më të kuptueshëm.
Sipas Ministrisë së Infrastrukturës, pyetjet në testin teorik janë përmirësuar për të shmangur paqartësitë dhe ngjashmëritë e tepërta mes përgjigjeve, një ankesë e shpeshtë e kandidatëve ndër vite. Përveç kësaj, është prezantuar edhe një doracak zyrtar që përmban informacion të detajuar për të gjitha kategoritë e patentë shoferëve.
“Forma e re e testimit krijon lehtësira për kandidatët, rrit efikasitetin dhe përmirëson cilësinë e vlerësimit të njohurive. Ky ndryshim nuk synon të rrisë kalueshmërinë, por të sigurojë një proces më të drejtë dhe transparent,” thuhet në përgjigjen e Ministrisë për lajmi.net.
Mundesh me e lexu edhe…
Gjatë vitit 2024, mbi 83 mijë persona janë pajisur me patentë shoferi në Kosovë. Nga 1 janari deri më 30 nëntor 2024, provimin teorik e kanë dhënë 94,819 kandidatë, ndërsa në provimin praktik janë testuar gjithsej 56,358 kandidatë.
“Departamenti për patentë shoferi është përgjegjës për testimin e kandidatëve për të gjitha kategoritë, qoftë në provimin teorik apo praktik. Sipas raporteve të e-testimit, nga janari deri në nëntor 2024 janë testuar 94,819 kandidatë në pjesën teorike dhe 56,358 kandidatë në atë praktike,” sqaroi Ministria e Mjedisit, Planifikimit Hapësinor dhe Infrastrukturës.
Përmirësimet në testimin për patentë shoferi janë ndihmuar edhe nga digjitalizimi i procesit. E-testimi ka sjellë një sistem më të organizuar dhe të kontrolluar, duke minimizuar gabimet dhe duke rritur saktësinë në vlerësimin e kandidatëve.
Në Kosovë, posedimi i një patenta shoferi është i domosdoshëm për shumicën e qytetarëve, duke qenë se automjetet private mbeten mjeti kryesor i transportit. Mungesa e metrosë, infrastruktura e papërshtatshme për përdorimin e biçikletave dhe kushtet shpesh kaotike në transportin publik e bëjnë veturën mjetin më të përshtatshëm për qarkullim.
Me këto ndryshime, kandidatët pritet të kenë një proces më të qartë dhe të drejtë për t’u pajisur me patentë shoferi./Katror.info
Përgatiti:
