Presidentja e Kosovës, Vjosa Osmani, ka theksuar rëndësinë e të vërtetës si një armë kyçe për mbrojtjen e demokracisë dhe lirisë, gjatë lansimit të raportit të Zyrës së Bashkimit Europian dhe Rrjetit Ballkanik për Gazetari Hulumtuese (BIRN Kosova) rreth fenomenit të dezinformimit, që u lansua pikërisht në Ditën Ndërkombëtare të Verifikimit të Fakteve, shkruan Katror.info.
Osmani theksoi se “pa të vërtetën nuk mund të ketë demokraci të mirëfilltë”, duke shtuar se ajo është e domosdoshme për vendimmarrjen e sigurt dhe për ruajtjen e besimit ndërmjet qytetarëve dhe institucioneve. Ajo theksoi gjithashtu se dezinformimi dhe manipulimi rriten kur e vërteta sulmohet, duke rrezikuar lirinë dhe stabilitetin e shtetit.
“Sulmet ndaj të vërtetës janë sulme ndaj lirisë. Kontrollimi i fakteve është përgjegjësi e gjithë shoqërisë, jo vetëm e gazetarëve”, tha Osmani. Ajo e lidhur rëndësinë e medias profesionale, e cila duhet të shërbejë për të mbrojtur të vërtetën dhe vlerat e demokracisë, transparencës dhe lirisë.
Mundesh me e lexu edhe…
Presidentja gjithashtu theksoi kërcënimet që dezinformimi dhe gjuha e urrejtjes paraqesin për integritetin demokratik të Kosovës, duke përmendur ndikimin e aktorëve të huaj si Rusia dhe Serbia, të cilët përdorin narrative përçarëse për të minuar besimin në proceset demokratike të vendit.
Për zgjedhjet e vitit 2025, Osmani theksoi se fushata zgjedhore ishte e mbushur me dezinformim dhe gjuhë urrejtjeje, çka polarizoi elektoratin dhe rrezikoi integritetin e zgjedhjeve.
Ndërkaq, shefi i Zyrës së BE-së në Kosovë, Aivo Orav, deklaroi se dezinformimi nuk është thjesht përmbajtje mashtruese, por një kërcënim i drejtpërdrejtë për thelbin e demokracisë. Ai theksoi se çdo individ mund të bëhet objekt i manipulimit të informacionit dhe përmendi ndikimin e aktorëve të jashtëm në përhapjen e dezinformimit, që ka si synim destabilizimin e besimit në procesin zgjedhor të Kosovës.
Orav gjithashtu theksoi se Bashkimi Evropian mbetet i përkushtuar për të mbështetur lirinë e medias dhe luftën kundër dezinformimit.
Raporti i BIRN Kosova thekson nevojën urgjente për trajtimin e kërcënimeve të tilla, për të siguruar një sistem zgjedhor të besueshëm dhe të mbrojtur nga kërcënimet hibride./Katror.info
Përgatiti:
