Presidentja e Kosovës, Vjosa Osmani, edhe një herë në prani të liderëve europianë ka kërkuar që të largohen masat e vendosura ndaj Kosovës nga Bashkimi Europian.
“Unë përfaqësoj shtetin i cili është i vetmi në këtë tavolinë që ka masa nga Bashkimi Europian, dhe asnjëri nuk mund të na tregojë arsyen se pse kjo është ende kështu”- tha presidentja Osmani më 16.05.2025 në fjalimin e saj në seancën përmbyllëse të samitit të Komunitetit Politik Europian që u mbajt në Tiranë.
Osmani u bëri thirrje të gjitha shteteve të Bashkimit Europian dhe lidershipit europian të marrin guximin për të marrë atë vendim për të hequr ato masa për shtetin më pro-europian në botë.
Në këtë samit, ndër më të mëdhenjtë të organizuar ndonjëherë në kryeqytetin shqiptar, Kosova u përfaqësua nga presidentja Vjosa Osmani.
Mundesh me e lexu edhe...
Ndër figurat kryesore politike ishin presidenti francez Emanuel Macron, presidenti i Këshillit Europian, Antonio Costa, shefi i NATO-s, Mark Rutte, presidentja e Komisionit Europian, Ursula von der Leyen, kryeministri britanik, Keir Starmer, presidenti ukrainas, Volodymyr Zelensky, kryeministrja daneze, Mette Frederiksen, kryeministrja italiane, Giorgia Meloni, presidenti turk, Recep Tayyip Erdogan, kancelari gjerman, Fridrich Merz, kryeministri hungarez, Viktor Orban.
Nën moton “Europa e re në një botë të re: unitet – bashkëpunim – veprim i përbashkët”, samiti pati synim të forcojë dialogun dhe bashkëpunimin ndërmjet vendeve europiane për siguri, demokraci dhe zhvillim të qëndrueshëm.
Temat kryesore gjatë samitit ishin: Siguria europiane dhe mbështetja për Ukrainën, forcimi i mbrojtjes dhe demokracisë, rritja e konkurrueshmërisë përmes inovacionit dhe investimeve, sfida të mobilitetit, përfshirë migrimin dhe lëvizjen e të rinjve.
Diskutimet u zhvilluan në tri tryeza tematike: sigurimi i Europës dhe forcimi i rezistencës demokratike; një Europë për 600 milionë qytetarë: inovacion dhe siguri ekonomike dhe e treta: Europë e hapur me kufij të sigurt: sfidat e mobilitetit dhe fuqizimi i të rinjve.
Përveç 27 vendeve anëtare të BE-së, në samit morën pjesë edhe vende të Ballkanit Perëndimor, përfshirë Shqipërinë si vend mikpritës, Kosovën, Serbinë, Malin e Zi, Maqedoninë e Veriut dhe Bosnjë-Hercegovinën, si dhe liderë nga Mbretëria e Bashkuar, Ukraina, Turqia dhe shtete të tjera europiane. Të ftuar ishin edhe sekretarët e përgjithshëm të NATO-s, Këshillit të Europës dhe OSBE-së.
Ky është samiti i gjashtë që nga krijimi i platformës.
Samitet e mëparshme janë mbajtur në Çeki, Moldavi, Spanjë, Mbretërinë e Bashkuar dhe Hungari, me temat që kanë përfshirë luftën në Ukrainë, sigurinë energjetike, migrimin dhe mbrojtjen e demokracisë./Kallxo.com /Katror.info
Përgatiti:
