Presidentja e Republikës së Kosovës, Vjosa Osmani, po vazhdon qëndrimin e saj zyrtar në Shtetet e Bashkuara të Amerikës, ku po merr pjesë në punimet e Asamblesë Parlamentare të NATO-s, shkruan Katror.info
Në kuadër të kësaj vizite, Presidentja Osmani ka qenë sot folëse në një panel të rëndësishëm kushtuar integrimit euroatlantik të Kosovës, si dhe çështjeve të paqes dhe sigurisë në Ballkanin Perëndimor.
“Reformat tona dhe investimi në fushën e mbrojtjes dhe sigurisë po e pozicionojnë Kosovën si partnere mes vendeve që ndajnë të njëjtat vlera të lirisë dhe sigurisë”, ka shkruar ajo në një postim në rrjetin social Facebook.
Mundesh me e lexu edhe…
Presidentja Osmani theksoi gjithashtu rëndësinë e mbështetjes së Shteteve të Bashkuara të Amerikës dhe aleatëve të tjerë ndërkombëtarë në ndërtimin e një të ardhmeje më të sigurt për rajonin.
“Me mbështetjen e aleatit tonë strategjik, Shteteve të Bashkuara të Amerikës, si dhe aleatëve të tjerë, po forcojmë themelet e një rajoni më të sigurt, më të qëndrueshëm dhe të përkushtuar ndaj vlerave demokratike”, u shpreh ajo.
Një ditë më parë, gjatë një takimi me delegacionin amerikan në Asamblenë Parlamentare të NATO-s, Osmani shprehu mirënjohjen e saj për përkrahjen e vazhdueshme që SHBA-ja i ka dhënë dhe vazhdon t’i japë Kosovës në rrugëtimin e saj ndërkombëtar./Katror.info
