Presidentja e Kosovës, Vjosa Osmani, në një ceremoni të veçantë të mbajtur të premten, nderoi me medaljet presidenciale disa nga rock-grupet më të njohura të vendit që shkëlqyen në dekadën e tetëdhjetave. Faqja zyrtare e Presidencës së Kosovës në Facebook ndau disa fotografi të këtij momenti të veçantë, ku liderët e këtyre grupeve u shfaqën duke pranuar dekoratat me krenari nga dora e Presidentes.
Në njoftimin e plotë të publikuar në Facebook, Presidenca e Kosovës theksoi rolin vital që këto grupet kanë luajtur në skenën kulturore të Kosovës, në një periudhë kur kultura kombëtare ishte nën presion dhe në përpjekje të vazhdueshme për t’u çliruar nga okupimi.
“Rock grupet e viteve ’80 kanë qenë pjesë e “boom”-it kulturor në Kosovë, në kohën kur ajo po shtypej e kultura jonë po mohohej. Muzika e tyre paralajmëroi e stimuloi ndryshime shoqërore dhe u bëri jehonë aspiratave, zhgënjimeve dhe ëndrrave të një brezi të etur për ndryshim”, shkruhet në faqen e presidencës.
Mundesh me e lexu edhe…
“Ceremonia e mbajtur mbrëmë nga Presidentja Osmani ishte një mirënjohje për kontributin e tyre të çmuar, dhe ajo personalisht u ndau Medaljen Presidenciale të Meritave grupeve të shquara të rock-ut të asaj epoke, duke përfshirë: Minatori, Trix, Elita 5, TNT, Gjurmët, Oda, 403, MAK, Ilirët, Telex, Fisnikët e Fontana”, shtoi njoftimi.
Kjo ceremoni shërben jo vetëm si një vlerësim i artit dhe i angazhimit politik që këto grupe kanë bërë përmes muzikës së tyre, por edhe si një kujtesë për brezin e ri se rrugëtimi për liri, demokraci dhe prosperitet është ndërtuar mbi themelin e fuqishëm të shprehjes kulturore dhe kreativitetit artistik.
Ndarja e këtyre medaljeve vjen si një simbol i njohjes së lartë dhe falënderimit për pioneërit e muzikës rock në Kosovë, të cilët me veprat dhe tingujt e tyre jo vetëm që kanë formuar një pjesë të identitetit kulturor të vendit, por kanë ndezur dhe mbajtur gjallë shpresën e një brezi në kohë të vështira. /Katror.info
Përgatiti:
