Ministria e Kulturës, Rinisë dhe Sportit ka prezantuar sot projektin për Teatrin e Operës dhe Baletit, fituar nga konzorciumi “Big Partners Ltd & ALB Architect”.
Teatri pritet të ndërtohet në zemër të Prishtinës dhe sipas MKRS-së përmban sallën koncertale me mbi 1200 ulëse, sallën teatrale me 1000 ulëse, dhomën koncertale dhe dhomën teatrale, të dyja me nga 300 ulëse.
Po ashtu do të akomodojë parkingun nëntokësor me kapacitet me mbi 400 vendparkime pranë unazës së brendshme të Prishtinës, dhe do të jetë kalimi më spektakolar në mes të Pallatit të Rinisë dhe Sporteve dhe lagjes Arbëria.
Mundesh me e lexu edhe…
Për projektin ka shkruar edhe kryeministri i Kosovës Albin Kurti.
“Sot prezantuam projektin fitues për Teatrin e Operës dhe Baletit, një mishërim i vizionit të guximshëm të arkitektit të famshëm danez Bjarke Ingels, me të cilin po fillon një epokë e re artistike për Kosovën. Pas 50 vitesh shtëpia e re e institucioneve qendrore të arteve muzikore dhe skenike do t’i ofrojë Prishtinës një ikonë të munguar të arkitekturës bashkëkohore, duke e vendosur atë në lartësinë e hartës botërore të kulturës.”
Sipas Kurti, Bjarke Ingels, njëherit themeluesi i shtëpisë prestigjioze të projektimit BIG, “është ndër arkitektët më inovativë të kohës sonë i njohur për projektet mbresëlënëse si rrokaqielli piramidal “Via 57 West” në New York, centrali energjetik CopenHill me pistë skijimi në Kopenhagë, selia e Google në Kaliforni dhe “The Spiral” në Manhatan.”
Vlera e projektit për Teatrin e Operës dhe Baletit është 2 milionë e 450 mijë euro dhe pritet të përfundojë për 15 muaj, ndërsa zbatimi fillon në vitin 2026.
Ministri i Kulturës, Rinisë dhe Sportit, Hajrulla Çeku gjatë ceremonisë së nënshkrimit të projektit fitues për Teatrin e Operës dhe Baletit tha se kjo ditë shënon një ditë historike për artin dhe kulturën në vend.
“Unë ndjehem jashtëzakonisht i nderuar dhe kam kënaqësinë të shpalos para jush një nga arritjet kulmore të Qeverisë së Republikës së Kosovës në vitet e fundit, prezantimin e projektit fitues të Teatrit, Operës dhe Baletit të Republikës së Kosovës, një kryevepër arkitektonike që lartëson kryeqytetin tonë, Prishtinën, në peisazhin global të Arkitekturës dhe të Kulturës. Kjo ndërtesë do të jetë shtëpia e të paktën katër institucioneve me rëndësi të veçantë në ekosistemin tonë kulturor dhe njëherit dëshmi e përkushtimit shtetëror për përkushtimin e kulturës në vendin tonë”, ka thënë Ministri Çeku.
Ndërsa Arkitekti, Bjarke Ingels derisa prezantoi projektin në detaje, ka thënë se ndihet i nderuar që i është besuar krijimi i këtij projekti me rëndësi të madhe për artin e Kosovës.
“Jam shumë i nderuar që më është besuar përgjegjësia që t’i jap formë të ardhmes së artit në Kosovë. Në fakt Kosova dhe shqiptarët e Kosovës janë njerëz që kanë ndikim të madh kulturor në artet perfomuese, shumë përtej kufijve të vendit të tyre. Në fakt nuk është hera e parë që punoj për shqiptarët e Kosovës”, ka thënë ai.
Sfidë për të ka qenë krijimi i një shenje dalluese për artet perfomuese në Prishtinë, ku ridefinohet identiteti kulturor i Kosovës, me qëllim të ngrisë praninë e artit shqipar në skenën ndërkombëtare.
“Do të jetë e hapur me pamje të tillë, duke e paraqitur shëmbëlltyrën e xhubletës, veshjes kombëtare. Kemi shikuar një familje të xhubletave ta kombiojmë me pamjen e Pallatit të Rinisë dhe Sporteve në këtë thirrje të hapur. Xhubleta edhe ashtu ka një pamje shumë arkitektonike, me këto shtresa horizontale që paraqesin perimetrin duke krijuar këtë gjest elegant pa përpjekje fare. Kemi meduar se si mund të kombinojmë krijimin e një simboli të ri kombëtar me ndërtimin e shtëpisë për artet performuese të klasit botëror. Pra të jetë një shenjë dalluese akitektonike, por edhe të jetë një ambient vibrant përfshirës dhe në fund të jetë e rrënjosur në trashëgiminë arkitektonike me pamje të xhubletës të kombinuar me teknologji dhe inovacion”, ka thënë arkitekti Ingels.
Drejtuesit e institucioneve që do vendosen në Teatrin e Operës dhe Baletit, artistët dhe artdashës e kanë mirërpritur projektin.
“Sot Ministria e Kulturës, Rinisë dhe Sportit ka prezantuar projektin ideor të Teatrit të Operës dhe Baletit të Republikës së Kosovës e arkitektit @bjarkeingels – Ky është një hap drejt bërjes me shtëpi të katër institucioneve të Kosovës: Filharmonia e Kosovës, Opera e Kosovës, Baleti Kombëtar i Kosovës – The National Ballet of Kosova dhe Ansamblit “Shota”. 3 shkurti është një hap më afër realizimit të asaj që gjenerata të tëra e kanë ëndërruar dhe për të cilën kanë punuar – një shtëpi dinjitoze për artin skenik dhe muzikor në Kosovë,” ka shkruar Dardan Selimaj, ushtrues detyre i drejtorit të Filharmonisë së Kosovës.
Profesoresha e muzikës, Besa Luzha e ka vlerësuar projektin si shumë të bukur dhe funksional, si një shtëpi dinjitoze për komunitetin artistik muzikor, të baletit, ansamblit të valleve dhe gjithë publikun artdashës.
“Tani mbetet të shpresojmë që ky objekt të realizohet sa më shpejt (5 vite, sipas arkitektit) nëse procedurat vijojnë pa pengesa dhe nëse sigurohet buxheti i duhur për këtë objekt të rëndësishëm që do të shërbejë për shumē gjenerata pas. Urojmë të përjetojmë shfaqje dhe momente të bukura në të ardhmen sa më të afërt, ” ka shkruar ajo në Facebook./Katror.info
/Katror.info
Përgatiti:
