Nëse në këto ditë pranvere nuk po gjeni asgjë te re në Netflix, dhe doni me pa filma të rinj dhe dokumentarë, atëherë, kryeqyteti sjell një mundësi për ju. Festivali Ndërkombëtar i Filmit në Prishtinë, PriFest, nga e hëna e deri të enjten përmes programeve PriGlobal dhe PriDox e ka hapur një mundësi të artë që ju të jeni të parët të shihni filma dhe dokumentarë të përzgjedhur, që jepen premierë në Kosovë.
Armond Morina nga PriFest, siguroi adhuruesit e filmit se për katër ditë me radhë, PriGlobal dhe PriDox do të sjellin filma dhe dokumentarë të mrekullueshëm.
“Po kthehemi me edicionin e dytë të PriGlobal dhe PriDox, gjatë të cilit do të vijnë 3 filma të metrazhit të gjatë dhe 3 dokumentare. Pra nga sot deri më 18 do të ketë filma të mrekullueshëm,” tha Morina.
Mundesh me e lexu edhe...
Dhe kjo u dëshmua me filmin e parë që u shfaq të hënën në mbrëmje, i cili mbërtheu audiencën me ndikimin e madh emocional që përçoi te ta.
“E vetmja gjë që di Ryan për babanë e tij është që ai është një ‘Paki’ (pakistanez). Ai ëndërron që dikur babi do të kthehet dhe do ta largojë prej shtëpisë të dashurin e ri të nënës së tij, Jasonin. Kur ai e sheh një burrë të lënduar duke u fshehur në një kontejner të mallrave në djerrinën afër shtëpisë së tij, për të thuajse i është realizuar një ëndërr.”
“No Way Home” e regjisorit Yusuf Alli Khan e hapi PriGlobal për t’i lënë rrugë, filmave “A Strange Path” të Guto Parente dhe “Family Portait” të Lucy Kerr, që do të shfaqen të martën. Ndërsa, në dy ditët e PriDox, do të shfaqen dokumentarët The Moon will Contain Us, The Third Man, Bubbles dhe Ennio. Ky i fundit i kushtohet kompozitorit Ennio Morricone dhe magjisë që ai bëri me kompozimet e tij, duke i definuar madje edhe karkateret në filma.
“PriDox dhe Priglobal janë duke i dhënë më shumë frymë edhe më shumë edicionit të PriFest, pjesës më të rëndësishme që e kemi ne si PriFest, dhe po ju jep mundësi njerëzve që me pasë aktivitete gjatë gjtihë vitit, sikur kur i kemi dërguar edhe filmat tanë në Tiranë dhe njerëzit kanë mundësi të vjnë dhe t’i shohin këta filma, të cilët realisht nuk është e mundur që t’i shohin në kinema. Këta janë filma të festivaleve, janë filma ‘art haus’ dhe kryesisht gjenden vetëm ne festivale. Kështu që mundohemi më bo një përzgjedhje, një seleksionim jashtëzakonisht të mirë,” tha në një deklaratë për Katror Media, Armend Zeqiri nga PriFest.
Të gjithë filmat janë pa pagesë dhe jepen nga ora 20:00 në Kino Armata. Andaj, aktori Armond Morina fton të gjithë adhuruesit e filmave që mos e lëshojnë rastin që të vijnë dhe shohin filma të të rinj dhe interesantë.
“Njerëzit munden me mendu pse kanë rëndësi, por ky është impakti që e japin në audiencë prandaj duhet me i thirr njerëzit me ardhë me i pa këto rrëfime të mrekullueshme. Këta filma shkojnë në festivale prestigjioze dhe dalin shumë ma vonë në televizion sepse TV-të janë të vonshëm me i ble te drejtat e filmave artistikë. Prandaj, ky është një oportunity shumë e madhe për publikun dhe tash i kanë pa pagesë mund të vijnë, studentët, audienca sepse një film i mirë ta ndërron botëkuptimin për jetën,” tha Morina, i cili ka një mesazh për të rinjtë.
“Unë besoj se kohën e lirë të rinjtë tanë duhet me stimulu ma shumë me i pa aktivitetet kulturore, përveç filmave, teatrorit, ekspozitat por edhe mediumi ynë duhet me i dhanë hapësirë ma shumë, sepse kur një send del cdo ditë në media. Ideja jonë është që dalëngadalë me i orientu gjeneratat tona atë që deri diku Evropa e ka mbërri, me përqafu artin. Jeta nuk është vetëm ‘kafiq’, jeta është edhe në bibliotekë, galeri, kinema e teatër,” tha Morina.
Ndryshe, Festivali PriFest do të mbahet nga data 10 deri më 16 shtator./Katror.info
Përgatiti:
