Këtë javë, Primark, shitësi me pakicë i veshjeve ekonomike, ka prezantuar një koleksion mode ‘adaptive’ me 49 veshje për gra dhe burra, të dizajnuar për t’iu përshtatur një gamë të gjerë nevojash.
Koleksioni, i prezantuar të hënën, është dizajnuar në bashkëpunim me Victoria Jenkins, një stiliste me nevoja të veçanta dhe themeluese e markës ‘Unhidden’.
Ky koleksion vjen pas lansimit nga Primark të një linje të brendshmeve adaptive në janar të vitit 2024, shkruan Positive News, transmeton Katror.info.
Mundesh me e lexu edhe…
Produktet janë krijuar për të lehtësuar veshjen, duke përfshirë zinxhirë magnetikë, mbyllje me presion, dhe rripa në bel që ndihmojnë në tërheqjen e pantallonave, si dhe hapje të fshehta për qasje në tuba, stoma ose kateter.
Gjithashtu, ka opsione të përshtatshme për personat që përdorin karrige me rrota.
Sipas Primark, koleksioni që përfshin edhe veshje nate dhe të brendshme është zhvilluar përmes fokus grupeve dhe sesioneve të përshtatjes me pjesëmarrës nga komuniteti i personave me nevoja të veçanta.
“Është një moment jashtëzakonisht krenar të shohësh këtë koleksion të dalë në shitje dhe modën adaptive të arrijë në dyqane të zakonshme në këtë shkallë për herë të parë”, tha Jenkins.
“Personat me aftësi të kufizuara përballen me shumë pengesa në jetën e tyre, dhe veshjet nuk duhet të jenë një prej tyre. Ne nuk duam të jetojmë në një uniformë me pantollona të gjera dhe bluza, por shpesh nuk kemi zgjedhje. Shpresoj që ky lançim të jetë një hap drejt ndryshimit të këtij rrëfimi, duke sjellë më shumë zgjedhje në dyqane”, shtoi ajo.
“Personat me aftësi të kufizuara përballen me shumë pengesa në jetën e tyre, dhe veshjet nuk duhet të jenë një prej tyre. Shpresoj që ky lançim të jetë një hap drejt sjelljes së më shumë zgjedhjeve në dyqane” tha ajo tutje.
Edhe pse 24% e popullsisë në Mbretërinë e Bashkuar jeton me aftësi të kufizuara, një hulumtim i kryer nga Primark në bashkëpunim me ‘Institutin e Kërkimit për Konsumatorët me Nevoja të Veçanta’ zbulon se tre të katërtat e tyre hasin vështirësi në gjetjen e veshjeve të përshtatshme.
Shtatë nga dhjetë të anketuar raportojnë se detyrohen të shpenzojnë më shumë për veshje që plotësojnë nevojat e tyre, ndërsa 80% ndihen të përjashtuar nga mundësia për të blerë veshje me stil.
Koleksioni do të jetë i disponueshëm duke filluar nga e marta, 28 janar, në 31 dyqane në Mbretërinë e Bashkuar dhe përmes 113 dyqaneve që ofrojnë shërbimin Click & Collect.
Zinxhiri i modës së shpejtë, që tërheq shitje vjetore prej 9 miliardë £, është i specializuar në ofrimin e trendeve më të fundit me çmime të ulëta.
Ai është promovuar me premtimin për “ta bërë veshjen të përballueshme dhe të qasshme për të gjithë”./Katror.info
Përgatiti:
