Prishtina do të shënojë me madhështi Ditën e Çlirimit, përmes një kalendari të pasur me ngjarje kulturore dhe artistike që do të zhvillohen gjatë gjithë muajit qershor. Disa nga aktivitetet do të përfshijnë koncerte, promovime librash, tryeza diskutimi dhe panaire, të organizuara nga institucione të ndryshme kulturore e artistike në kryeqytet, shkruan Katror.info.
Festimet nisin më 5 qershor, me vazhdimin e koncerteve të Chopin Piano Fest Prishtina, që do të mbahet në Bibliotekën Qendrore Universitare, me fillim nga ora 20:00.
Më 6 qershor, aktivitetet vazhdojnë me një tryezë diskutimi, ndër të tjera,, për të drejtat dhe punësimin e artistëve të pavarur, organizuar nga Chopin Piano Fest, që do të mbahet nga ora 12:00, si dhe me një koncert pianistike nga artisti Marcel Mora (Kuba/Suedi), që do të mbahet po atë ditë nga ora 20:00. Po ashtu, më 6 qershor, në hapësirat e Defy Them, do të promovohet libri “Historia e Rock and Roll-it në Kosovë”, nga ora 20:00.
Mundesh me e lexu edhe…
Më 7 qershor, publiku do të ketë mundësi të shijojë koncertin e grupit “Starfish”, i cili do të mbahet nga ora 20:30.
Në kuadër të festimeve, më 11 qershor, do të zhvillohet një ndeshje mes yjeve të sportit dhe kulturës, e dedikuar çlirimit të Prishtinës, ndërsa po atë ditë fillon edhe Panairi i Librit në Pallatin e Rinisë, i cili do të zgjasë deri më 15 qershor, me orar nga 09:00 deri në 21:00.
Festivali i birrës Beerfest Kosova do të mbahet nga 14 deri më 17 qershor, duke sjellë atmosferë festive dhe muzikë në mbrëmje nga ora 18:00.
Aktivitetet përmbyllen më 18 qershor, me një koncert festiv elektronik “Shkodra Elektronike”, organizuar nga Drejtoria e Kulturës në bashkëpunim me Artpolis, që do të mbahet në AMC Hall, me fillim nga ora 20:00.
Këto janë vetëm disa nga aktivitetet që do të mbahen në kuadër të shënimit të kësaj ngjarjeje./Katror.info
