Më 3 prill, Prishtina ishte nikoqire e edicionit të tretë të PowerToHR, një samit inovativ i organizuar nga KosovaJob, ku mbi 40 folës nga kompani ndërkombëtare si Google, META, Booking, Adidas, Wolt e kompani vendore diskutuan për të ardhmen e burimeve njerëzore, imazhin e punëdhënësve dhe ndikimin e inteligjencës artificiale (AI).
Serkan Deveci, një lider i lartë në fushën e burimeve njerëzore në Google, me mbi 15 vjet përvojë globale në planifikimin strategjik të fuqisë punëtore tha se punëtoret e kënaqur janë çelësi i suksesit të kompanisë.
“Përgjatë gjithë karrierës sime, me pasion kam udhëhequr duke u mbështetur në një parim thelbësor: për të pasur të ardhura të qëndrueshme, duhet të kesh klientë të kënaqur – dhe për të pasur klientë të kënaqur, duhet të kesh punonjës të lumtur. Por, shpesh harrojmë këtë lidhje të hulumtuar, të dëshmuar dhe kaq tërheqëse mes angazhimit të punonjësve dhe performancës financiare të kompanisë,” tha Deveci, duke shtuar se nuk ka shkop magjik për të ndryshuar angazhimin e punonjësve, por çelësi qëndron te durimi, këmbëngulja dhe përkushtimi i vërtetë.
Mundesh me e lexu edhe…
Kremena Yordanova, ish-Drejtoreshë e Marketing Activations në Adidas, thotë se me gjithë zhvillimin e inteligjencës aritficiale, kreativiteti që buron nga njerëzit nuk do zhduket.
“Do të doja të besoja se kreativiteti nuk po zhduket. Përkundrazi, po rigjallërohet nga fakti që tani mund ta shkurtojmë ndjeshëm kohën nga ideimi deri te realizimi dhe të shohim menjëherë çfarë funksionon dhe çfarë jo. Kjo, në fakt, do të krijojë më shumë hapësirë për të hyrë më thellë në nivele më të avancuara të kreativitetit, sepse me mjetet që kemi aktualisht, mund të krijojmë përmbajtje mesatare, fushata të zakonshme. Por ajo që do ta shtyjë kreativitetin përpara do të jenë ndërveprimet e sinqerta njerëzore që mund t’i krijojmë përmes fushatave apo ngjarjeve interaktive si kjo. Inteligjenca artificiale nuk do të ishte në gjendje të ndajë këtë njohuri po të mos isha unë këtu për ta ndarë, thotë për Katror Media Jordanova, e cila si shumë të huaj që vijnë në Kosovë, tha se ajo që I pëlqen më shumë në Kosovë është mikpritja dhe atmosfera e ngrohtë.
Një pjesë shumë e rëndësishme e eventit, sipas Gili Hoxhës nga Kosova Job, është ajo e PR Zone ku janë ofruar 18 perspektiva të ndryshme.
“Kjo pjesa e PR Zone është shumë e rëndësishme për shkak se përveç impaktit që ka këtu që sivjet njerëzit munden me ardhë dhe m’i dëgju për së afërmi perspektivat, ka me pasë edhe artikuj, publikohen mandej edhe si video edhe e fuqizon edhe Kosova JOB-in edhe Akademi Punës si një platformë edukuese, ku njerëzit e kanë mundësinë prej atyne HR-ve në vijën e parë të frontit, m’u përball pikërisht me ato njohuritë që ata i kanë edhe me mësu prej tyne.”
E pikërisht në këtë PR Zone ishte edhe drejtori ekzekutiv I Katror Media, Muhamet Jashanica, I cili ndau përvojën e mediumit të parë në gjuhën shqipe për lajme të mira dhe gazetari konstruktive, që kësaj here ishte media partner i samitit global Power to HR.
“Katrori, tash e tri vjet, jemi në vitin e tretë, është një storie suksesi, kisha me thanë edhe natyrisht kjo i i atribuohet jo vetëm vizionit e misionit tim që e kam pasë prej fillimit për me shty përpara një media të pavarur që promovon si me thonë lajmet e mira edhe gazetarinë konstruktive, por natyrisht i atribuohet gjithë ekipit tim. Krejt bashkë kena punu çdo ditë, krejt bashkë punohemi çdo ditë audiencës tonë me i dhanë ma të mirën, lajme të vërteta, të verifikume mirë.
Shumë njerëz ma kanë bo pyetjen, qysh është e mundshme me mbijetu veç me lajme të mira ose a mbijetohet me lajme të mira ose a mbijeton një media online. Ne ja ku jemi, është viti i tretë, përveç që kemi mbijetu, kemi mbërri me rritë impaktin edhe kemi mbërri me zgjeru audiencën.”
Në samitin PowerToHR 3 janë eksploruar temat të rëndësishme mbi Inovacionin në burimet njerëzore si dhe Ndikimin e AI në burimet njerëzore.
“Këta thonë se AI is here to stay, edhe na qare s’patëm pa i ndjek. Këto veglat, aplikimi që e bën në secilën industri na duhet me e ndjek për shkak se nuk kemi kah i ikim, edhe qajo është e rëndësishme që Komuniteti e ka kuptu që nuk ka më metoda tradicionale, është shku edhe ato shku të zhvillim, qysh me thonë në projeksion gjeometrik. Po hyn në gjithçka, janë për mbi 801 mijë tools që përdoren, kështu që sa më shpejt aq më mirë, se përndryshe na shkel industria.”
Po pse është me rëndësi me ndjek një samit të tillë, sipas Zana Havollit nga Kosova Job.
“Thjesht është mundësia me netëorking me shumë njerëz, edhe kjo mendoj që ndikon në secilin që merr pjesë, se përveç se mëson shumë sende tjera prej folësve, që janë pjesë e këtij samiti. Qekjo u kon goxha big prej atyne unë mendoj që tash katërshi po e thom, ka me kanë hala ma big. Po shkojmë te u bo hala, t’u pru sene ma të reja, ma të mira, ma inovative. Kështu që veç rrini, pritni dhe stay tuned!,” tha Havolli.
Valon Canhasi, nga Hallakate thotë se një event i tillë ishte më se i nevojshëm.
“Pra, ka pasur nevojë Prishtina dhe Kosova për një ngjarje si kjo, ku njerëzit edhe bëjnë netëorking, por edhe vijnë mësojnë prej folësve të ndryshëm dhe përvojave të ndryshme gjë që mendoj që ndikon në zhvillim të përgjithshëm të bizneseve, po edhe individëve, po edhe studentëve që po i shoh që kanë ardhë me mësu.”
Agnesa Azemi Ademi nga Shoqëria e Avokatëve “Vokshi – Lata” thotë se presin gjëra të reja nga #PowerToHR edhe ne vitet e ardhshme.
“Realisht na presim që me edukim më të madh të bizneseve, domethënë edhe kjo është qëllimi i një prej parimeve tona të si shoqëria e avokatëve që me ju tregu kompanive se çka duhet me bo më shumë edhe çka munden ata me bo më shumë, në mënyrë që me shmang problematike, me pa problematika më pasoja më të mëdhaja për ata.”
Pjesëmarrësit e samitit kishin mundësinë të zhvillonin rrjetëzimin me individë të ndryshëm dhe të mësojnë nga folësit dhe përvojat e tyre./Katror.info
Përgatiti:
