Komuna e Prishtinës përurori një mural kushtuar Vjosa Berishës, themelueses së festivalit PriFest, në udhëkryqin e rrugëve “Garibaldi” dhe “Johan V. Hahn”, raporton Ekonomia Online.
Në ceremoninë përuruese mori pjesë kryetari i Prishtinës, Përparim Rama, i cili e vlerësoi Berishën për kontributin e saj të jashtëzakonshëm në kulturën e kryeqytetit. “Vjosa ka lënë gjurmë të thella dhe vazhdon të jetojë në zemrat tona. PriFest është vetëm një prej punëve të saj më të mëdha. Ky mural është simbol i përhershëm i frymëzimit që ajo ka dhënë për gjeneratat e reja,” tha Rama.
Muralin e realizoi artistja Ermira, e cila e përshkroi veprën si një simbol të përhershëm të inspirimit që Vjosa ka dhënë për të rinjtë. “Kam emocione të përziera. Ky mural do të jetë inspirim për të gjithë të rinjtë që një grua si Vjosa të jetë shembull në çdo rrugëtim,” tha ajo.
Mundesh me e lexu edhe…
Familja e Vjosa Berishës, përfshirë bashkëshortin Fatos Berisha dhe nënën Hysnie Istrefi, falënderoi artisten për nderimin. Hysnie Istrefi, me emocione, u shpreh: “Vjosa ende jeton në kujtesën dhe zemrat e njerëzve. Ka qenë energjike, e fjalës dhe e punës.”
Muralin tashmë mund ta shohin të gjithë qytetarët e Prishtinës, duke shërbyer si kujtesë e përhershme për një nga figurat më të rëndësishme të kulturës së qytetit dhe të artit filmik në Kosovë./EO/Katror.info
