Është një magji unike që ia japin Prishtinës ngjyrat e “Sunny Hillit” ende pa nisur. Prishtina pulson me ritmet e këtij festivali, përderisa shpërthimi pritet të premten me Dua Lipën. Ylli botëror është kryefjala e natës së parë, kur performon edhe Fatboy Slim, përderisa edicioni i sivjetmë pret të thyejë rekorde. Skena është gati, Dua Lipa ka kohë që ka premtuar një spektakël, siç po bën gjithandej globit, e publiku është në pritje.
Radhës së të rinjve që presin për t’i kompletuar procedurat për bileta në bulevardin qendror të Prishtinës nuk i shihet fundi. E afro 9 kilometra në periferi të kryeqytetit, të enjten pasdite, krejt në fund kanë qenë punimet në hapësirën ku do të mbahet edicioni i sivjetmë i festivalit “Sunny Hill”. Skena e madhe është gjigante dhe nuk i lë asgjë mangët krejt të tjerave në botë ku ylli global Dua Lipa interpreton para mijëra adhuruesve.
Rreth 30 mijë veta pritet t’i ketë përballë të premten mbrëma. Te ky numër pritet të sillet publiku për tri netët radhazi në festivalin që për këtë pjesë të Evropës është i pari. Lista e artistëve për këtë fundjavë është më e mira e Kontinentit të Vjetër.
Mundesh me e lexu edhe…
Kabinat për pajisje me shenjat që lejojnë hyrjen në Festival veçse janë renditur në hyrje të atij që tash është parku i “Sunny Hillit”. Aty pritet të ketë lumë njerëzish që ia mësyjnë hapësirës prej gati 19 hektarësh me tri skena. Artistët vendorë janë ata që do të mbajnë gjallë skenat çdo ditë në orët e para të mbrëmjes. E më vonë, emrat botërorë do të elektrizojnë gjithçka.
Më e rëndësishmja: Dua Lipa. “Radical Optimism” është turi i saj botëror sivjet dhe për Evropën Juglindore stacion ka Prishtinën, saktësisht fshatin Bërnicë e Poshtme.
Një armatë njerëzish kanë punuar të shtunën pasdite veç në skenën e madhe. Zgjatimi nga publiku e shkallët për një podium të lartë do të jenë në shërbim të koreografisë e performancës së yllit botëror Dua Lipa. Janë bërë qindra teste që gjithçka të jetë në vijë, prej koreografisë së dritave e deri te zërimi. Gjatë testeve janë lëshuar pjesë të performancës së saj në Liverpool. Skena s’dallon hiç nga ato botëroret.
Prej vitit 2018, kur mbahet festivali në Prishtinë, Lipa të premten mbrëma do të mbajë koncert për herë të tretë. Më 2018 solli magjinë e skenave botërore në Prishtinë. Më 2019 qe mysafire me një perfomancë të shkurtër në skenë. Më 2022 solli “Future Nostalgia”, ku përmbi një orë elektrizoi Parkun e Gërmisë.
E sivjet, në vendin që prej vitit të kaluar është shtëpi e festivalit, loja ka ndërruar. Me 62 metra gjerësi e mbi 30 metra thellësi dhe 18 metra lartësi, skena kryesore e Festivalit është muhabet tjetër. Ka përmasat e hapësirave që i duhen një ylli që kryeson toplistat botërore.
“Pritjet janë që ky edicion të jetë më i madhi ndonjëherë. Janë duke u bërë testimet e fundit. Gjithçka është gati dhe në vendin e vet. Kanë mbetur disa detaje të vogla teknike dhe presim një edicion të jashtëzakonshëm”, ka thënë Alban Kastrati nga “Sunny Hill”, gjatë një pauze të shkurtër midis punëve përgatitore. Hapësirat e pijeve, ushqimit e çka jo tjetër janë gati. Pritet të vërshohen nga njerëzit.
“Presim që mesatarja e vizitorëve të jetë 30 mijë në ditë. Sot (e enjte v.j.) dhe nesër (e premte v.j.) ka shumë interesim për bileta dhe ky numër mund të tejkalohet. Këtë vit kemi një numër në ngritje të audiencës ndërkombëtare që vjen në festival për shkak të ‘line up-it’, që është shumë unik dhe për fundjavën që po hyjmë më i miri në Evropë, nëse nuk jemi modestë”, ka thënë ai.
Shawn Mendes, Headie One, Anyma, MYGAL b2b Edgar Kerri, TSHA, Cil, Tommy Gold, Peggy Gou, Skream, Fatboy Slim, Bookie, Sugar Rush, Mochakk, Artssassin janë emrat e tjerë ndërkombëtarë që sivjet do të interpretojnë në Festival krahas vendorëve.
“Koncerti i Duas është në serinë e turit të saj global ‘Radical Optimism’, krejt spektakli i saj është i kompletuar sikurse në një skenë të ‘Wembley’ ose kudo tjetër në botë, njëjtë edhe Shawn Mendes po e fillon turin global nga Prishtina…. edhe të tjerët do të kenë shkëlqimin e vet dhe ky edicion do t’i thyejë rekordet në të gjitha kuptimet”, ka thënë Kastrati.
Rekordet kanë prekur edhe disa aspekte të tjera. Në platformën “Booking.com” Prishtina nuk ofron më strehë për vizitorë. Jepen si opsione të afërta në rrethin e Obiliqit e deri në Ferizaj.
Ylli botëror me prejardhje nga Prishtina, Dua Lipa, në platformën e saj “Service95” ka bërë rekomandime për vendet që duhet vizituar në një 72-orësh në Prishtinë. Prej të mërkurës ajo po qëndron në Kosovë.
“Që nga kafenetë e baret, te libraritë e pavarura, ndërtesat ikonike, Prishtina është një qytet që duhet të shihet, të përjetohet nëpërmjet muzikës dhe po ashtu nëpërmjet gjërave që e bëjnë atë speciale”, ka shkruar ajo. Galeria Kombëtare e Kosovës, Biblioteka Kombëtare e Kosovës, disa restorante e bare janë në listën e saj të rekomandimeve. Në radhët e pritjeve për bileta shihet se interesimi i audiencës së huaj nuk është i vogël, por në rritje e sipër.
“Rrjedha e audiencës do të jetë e ngjashme sikurse vitin e kaluar dhe pastaj kemi edhe një hyrje për VIP pasi kemi shumë njerëz të rëndësishëm të industrisë që vijnë në Prishtinë. Dalja mundësohet nëpërmjet autostradës”, ka bërë të ditur Alban Kastrati. Në Festival sivjet do të jetë i pranishëm Paul Tollet, promotori i shquar amerikan që vepron në Los Angeles, ndër të tjera, organizator i festivalit në Coachella, që e themeloi më 1999 tok me Rick Van Santenin. Aty do të jenë edhe udhëheqësi i “Creative Artists Agency”, Robert Kyncl, themelues i “Warner Music Group”, kompania me seli në New York, prej së cilës kanë dalë emra të shquar botërorë, e Chrisitofer Huber, kreu i European Festival Association. Sikurse në edicionet e kaluara, nuk do të mungojë as David Bradley, agjenti i Dua Lipës qysh prej filleve të karrierës së saj, e në listë është edhe Maha Dakhill, njëra prej agjenteve e zbulueseve më të mëdha të talenteve në art.
Kontributi shtetëror për Festivalin nuk është i vogël. Pos hapësirës së dhënë në shfrytëzim për 99 vjet, Komuna e Prishtinës sivjet e ka mbështetur atë me 200 mijë euro. Po ashtu institucionet e tjera janë shumë bashkëpunuese.
“Kemi shumë mbështetje nga Policia e pastaj edhe shumë sigurim privat. Kemi pasur edicionet e kaluara dhe asnjë incident nuk kemi pasur. Sivjet po ashtu janë marrë masat që të shijohet Festivali pa pasur as më të voglin problem”, ka thënë Kastrati. Edicionet e kaluara kanë qenë dëshmi e një mbarëvajtjeje shumë të mirë. Sivjet po ashtu pritet të ndodhë njësoj. E elektrizimi i masave pritet të jetë më i flaktë. T’i shkojë për shtati turit të Lipës, “Radical Optimism”./Koha.net/Katror.info
