Të gjitha përgatitjet janë në fazën finale për të pritur një prej ngjarjeve teknologjike botërore më të mëdha.
Konferenca “FOSS4G”, që ka rrugëtuar në dhjetëra vende e kontinente me një bagazh prej 15 vjetësh, të hënën zbarkon në Prizren, duke shënuar edhe ardhjen e parë në Ballkan.
Nga 26 qershori deri më 2 korrik, qyteti i kulturës do shndërrohet në cak teknologjik. 200 ligjërues për 1000 pjesëmarrësit që vijnë nga 120 vende të botës janë krejt çka e presin këtë rrugëtim si shans për Kosovën.
Mundesh me e lexu edhe…
Programi do të jetë i pasur me 80 punëtori, 200 prezantime, ligjërime akademike, sesione, ekspozita nga organizata dhe kompani të ndryshme që kontribuojnë në zhvillimin e teknologjisë gjeohapësinore. Por, ajka kryesore qëndron te pjesa akademike, ku do të mirëpriten shkencëtarët më në zë të teknologjisë gjeohapësinore.
“Nesër është dita! Jemi të lumtur që më në fund nisim konferencën #FOSS4G me sesione seminaresh që mbulojnë një mori temash! Do të fillojmë me punëtoritë e para në mëngjes, pasuar nga një set tjetër pasdite. Ju keni mundësinë të mësoni rreth menaxhimit të të dhënave tuaja gjeohapësinore me #PostgreSQL/#PostGIS, të njiheni me #GeoNode, të mësoni se si të bëni #GeoSpatial me #Python, të mësoni se si të krijoni një Infrastrukturë të të Dhënave Hapësinore (#SDI) me #OpenSourceSoftware duke përdorur #OSGeoLive dhe shumë tema të tjera që mund të eksploroni duke ndjekur linkun: https://2023.foss4g.org/agenda/workshop_schedule/#. Duke pritur me padurim ditët e ardhshme, ku bashkohen udhëheqës të mendimit, ekspertë të industrisë dhe profesionistë të pasionuar për të ndarë njohuri, për të frymëzuar dhe për të formësuar të ardhmen!,” thuhet në njoftimin e FOSS4G në faqen e tyre ne Facebook.
FOSS4G mbledh së bashku sektorin e teknologjisë, zhvilluesit, përdoruesit, vendimmarrësit dhe profesionistët nga një spektër i gjerë i organizatave dhe fushave të operimit.
Përmes shtatë ditëve të punëtorive, prezantimeve, diskutimeve dhe bashkëpunimit, pjesëmarrësit e FOSS4G krijojnë produkte, standarde dhe protokolle gjeohapësinore efektive që kanë ndikim global.
FOSS4G 2023 është ngjarje vjetore e organizuar nga Fondacioni i Hapur Gjeohapësinor (OSGeo) që nga viti 2006 dhe është një nga takimet më të mëdha globale për softuerin gjeohapësinor të vitit. FOSS4G 2023 organizohet nga FLOSSK, organizatë kosovare që promovon softuerin e lirë dhe të hapur që nga viti 2009. Vitin e ardhshëm konferenca udhëton për në Brazil.
Katror Media është partneri i vetëm medial vendor që do të ndjekë ngjarjet e “FOSS4G” dhe do t’ua sjell audiencës së vet të gjitha detajet e kësaj aventure teknologjike. /Katror.info
Përgatiti:
