Prizreni, një nga qytetet më të bukura dhe më historike të Kosovës, është kthyer në një nga destinacionet më të preferuara për vizitorët e huaj. Për turistët, ky qytet ofron një përvojë unike dhe të paharrueshme.
“Prizreni është vend shumë i bukur. Unë jam duke punuar këtu që nga viti 2018 dhe më së shumti më pëlqen të vizitoj Kalanë. Është një vend i qetë dhe ideal për të jetuar. Kam vizituar edhe Pejën e Mitrovicën, por në Prizren, sa herë kam mundësi, vij në kala, sepse nga aty mund të shohësh tërë qytetin”, ka treguar Sunuj nga India.
“Është magjepsës — një ndërthurje kulturash dhe monumentesh historike. Këtu nuk i lexon vetëm nëpër libra, por i përjeton nga afër. Pas Prizrenit, do të udhëtojmë në Prishtinë ku do të qëndrojmë për rreth një javë, ndërsa jemi në një turne për të eksploruar vendet e Ballkanit. Mendoj se Prizreni është një ndër vendet ku mund të ndjesh më së miri realitetin ballkanik”, është shprehur Robert Kozak nga Polonia.
“Besoj se Prizreni është vendi ideal për të mësuar më shumë rreth historisë së Ballkanit. Ky qytet ka një diversitet të madh kulturor dhe fetar. Po ashtu, kemi vërejtur se fliten disa gjuhë, gjë që e bën edhe më tërheqëse atmosferën këtu. Ajo që na ka bërë më shumë përshtypje është historia që kemi mësuar gjatë qëndrimit tonë. Kam provuar ushqime të ndryshme, por këtu gjithçka ka një shije krejtësisht ndryshe”, ka thënë Vajzmas Boris nga Brazili.
Kryetari i Shoqatës së Gastronomëve të Prizrenit, Ilir Shala, thekson se atraksionet më të vizituara në qytet janë Kalaja, Shadërvani dhe monumentet historike përreth tij.
“Ndër vendet më të frekuentuara janë Kalaja, Lidhja e Prizrenit, Ura e Gurit dhe Shadërvani, ku ndodhen edhe monumente të tjera të rëndësishme si Xhamia e Sinan Pashës, Hamami, Teqja dhe të tjera. Këto përbëjnë zemrën historike të qytetit dhe janë ndër pikat më të vizituara nga turistët”, ka thënë Shala.
Prizreni vazhdon të mbetet një nga perlë të vërteta të turizmit në Kosovë, ku historia, kultura dhe gastronomia ndërthuren për të krijuar një përvojë që lë mbresa të thella te çdo vizitor./RTKlive/Katror.info
Përgatiti:
