Pse shkencëtarët po përdorin satelitët për të numëruar krijesa detare të vogla?

Shkencëtarët besojnë se ndryshimet e lehta në ngjyrën e ujit të detit do t’u mundësojnë atyre të numërojnë nga hapësira krijesa të vogla, por jashtëzakonisht të rëndësishme, të deteve të Antarktikut.

Objektivi i këtij hulumtimi të ri janë krillet antarktike, të cilat janë vetëm disa inç të gjata dhe një nga kafshët më të bollshme dhe më të rëndësishme në planet, shkruan BBC transmeton Katror.info.

Jeta detare përfshirë balenat, pinguinët, fokat dhe shpendët detarë ushqehen me këto krijesa të imëta.

Megjithatë, shkencëtarët e ruajtjes së natyrës janë të shqetësuar se peshkimi dhe ndryshimet klimatike mund të kenë një ndikim negativ mbi to dhe thonë se na nevojiten mënyra të reja për t’i monitoruar këto krijesa.

“Krillet antarktike janë superheronjtë e Oqeanit Jugor,” tha Rod Downie, këshilltari kryesor për zonat polare në organizatën bamirëse për jetën e egër WWF-UK.

“Ato janë heronj të vegjël dhe të paçmuar që mbështesin një botë të jashtëzakonshme detare, por ndryshimet klimatike dhe peshkimi i paqëndrueshëm po i vënë në rrezik”, tha ai.

Studiuesit nga Universiteti i Strathclyde, WWF dhe British Antarctic Survey (BAS) po zhvillojnë një mënyrë të re për të përdorur satelitët me qëllim përcaktimin e numrit të krilleve në oqeanin rreth Antarktidës.

Çelësi qëndron te dallimet e lehta në sasinë e dritës që thith uji i detit në varësi të numrit të krilleve që notojnë në të.

Dr. Cait McCarry, nga Universiteti i Strathclyde, sapo është kthyer nga një udhëtim në Antarktidë, ku kapi krill për të matur këtë efekt.

“Ne fillojmë me ujë deti, pastaj shtojmë një krill dhe marrim një matje [të sasisë së dritës që thith uji, më pas, shtojmë një tjetër krill dhe bëjmë një matje tjetër”, shpjegoi ajo.

Sipas studiuesve, kjo analizë e mënyrës se si dendësia e krilleve ndryshon ngjyrën e oqeanit do t’i lejojë ata të marrin imazhe nga satelitët duke monitoruar popullsinë e krilleve nga hapësira.

Krillet janë ushqim për disa nga kafshët më të mëdha në planet përfshirë balenat gjigante që migrojnë mijëra kilometra drejt Antarktidës për t’u ushqyer me to.

Ato janë gjithashtu themeli i një oqeani të shëndetshëm pjesë e një cikli të dobishëm: balenat hanë krill, krillet ushqehen me bimë mikroskopike që jetojnë në akullin e detit, dhe këto bimë thithin karbonin që ngroh planetin gjatë rritjes së tyre.

Kur balenat defekojnë (në sasi të mëdha), ato plehërojnë bimët detare që ndihmojnë në ftohjen e planetit.

Megjithatë, me rritjen e temperaturave të oqeanit për shkak të ngrohjes globale, shkencëtarët e ruajtjes së natyrës janë të shqetësuar se ky cikël mund të prishet dhe se krillet mund të jenë të rrezikuara.

“Na duhet urgjentisht të menaxhojmë më mirë peshkimin dhe të mbrojmë habitatet e krilleve brenda një rrjeti zonash të mbrojtura detare”, tha Z. Downie.

“Ky projekt mund] të na japë një mjet të ri për të ndihmuar në monitorimin dhe mbrojtjen e kësaj specieje jetike”, tha ajo./Katror.info