Kishte filluar nga nevoja për të zgjidhur problemet e punësimit të studentëve, por shpejt u bë derë e adresimit të shumë çështjeve që prekin shoqërinë e Podujevës.
Oaktiv, është organizatë joqeveritare, që inicon projekte në komunën e Podujevës dhe zhvillon aktivitete të ndryshme vullnetare, kryesisht në mbështetje të fëmijëve dhe personave me nevoja të veçanata.
Genc Rashiti, drejtor ekzekutiv i organizatës Oaktiv themeluar në vitin 2018, shpjegon idenë dhe motivin rreth themelimit të organizatës të cilën ai e drejton.
Mundesh me e lexu edhe…
“Në kohën kur Oaktiv është formu, pothuajse secili prej neve e ka pasur problemin punësimin, kemi studiu dhe nuk na kanë ofru mundësi për me u zhvillu në fushën ku na kemi dashtë edhe si reagim i kësaj gjendje kemi formu Oaktivin, jo veç me u anku, po me vepru diçka dhe me përmirësu diçka në komb. Fokusi kryesor ka qenë në fillim tek studentët, te të rinjtë që i përfundojnë studimet. Po ashtu edhe ata që përfundojnë shkollën e mesme, drejt orientimit të tyre në për studime. Te studentët, një lloj avokimi për ta, procesin e punësimit. Kjo ka qenë ideja fillestare. Kemi qenë 12 të rinj, 12 shokë që e kemi formu këtë shoqëri. Secili prej tyre sot fatmirësisht është i punësuar edhe pjesa më e madhe e tyre nuk janë ata më që po kërkojnë punë, por janë ata që ofrojnë”, shprehet Genci.
Nga fokusi i problematikave studentore, organizata Oaktiv mori kahje më të zgjeruara, siç janë edhe fushatat sensibilizuese deri në krijimin e qendrës për fëmijë me nevoja të veçanta.
“Projekti ‘Ec me këmbët e tyre’ është një prej projekteve të Oaktivit që ka pas jehonën më të madhe në media. Oaktivi synimin kryesor e ka pasur për personat me nevoja të veçanta që me pasë një reagim qytetar, me pasë një mobilizim të shoqërisë dhe me i kuptu realisht cilat janë brengat e personave me nevoja të veçanta. Komplet si ngjarje, komplet si projekt e kemi zhvillu me qëllimin e sensibilizimit të komunitetit për personat me nevoja të veçanta. Një prej aktiviteteve, projekteve ose një prej veprave që ‘Ec me këmbët e tyre’ ia ka lanë qytetit të Podujevës -është edhe murali i qytetit, i cili është i kthyer kah komuna, kah vendimmarrësit, që ata sa herë t’i kthejnë sytë andej, të mendojnë që në kuadër të politikave tyre t’i fusin edhe personat me nevoja të veçanta”, thotë ai.
Genci shprehet i kënaqur që si rezultat i nismës së Oaktiv, sot në një nga shkollat e Podujevës është hapur një qendër për fëmijët me nevoja të vecanta.
“Sot shkolla Shaban Shala ka marrë një projekt, një donacion prej Bashkimit Evropian, një donacion shumë të konsiderueshëm, që është shndërru në një qendër për personat me një aneks të shkollës, për personat me nevoja ose më saktë fëmijët me nevoja të veçanta. Projekti, ‘Ec me këmbët e tyre’ është mbështetur prej UNDP-së, por për me rritë në shkallën sa ky projekt është rritur është një meritë shumë e madhe prej secilit anëtar të Oaktivit, që është angazhuar me të gjitha format që ka pasur mundësi për me rritë si projek”, shton tutje ai.
Oaktiv ka filluar si organizatë me mbështetje vetanake të anëtarëve, me aktivitete më të vogla, deri tek ato projekte bashkëpunuese madhore për qytetin.
“Nuk pres për me marrë diçka prej saj, por arsye se është kontribut që buron prej brenda dhe mu më bën me u ndje mire, kur e shoh që në komunitet kam dhënë një kontribut, kur e shoh që në komunitet ka ndodhur një ndryshim për shkak të inicimit tim dhe të ekipit të Oaktivit. Mbështetja pra e parë ka ndodhur prej vetë neve, prej vetë vullnetit tone. Shumë projekte janë kanë vetëfinancim d.m.th për shumë nisma, me i quajtë jo projekte janë kanë vetë financim prej anëtarëve të organizatës e mandej kemi kalu edhe projekte që kanë pasë afat më të gjatë, për shembull projekti Qytet Miqësor është prej projekteve më të mëdha…”, shprehet Genc Rashiti.
Ndërsa, edhe koordinatorja e këtij projekti ‘Qytet Miqësor’, Kaltrina Rushiti – Çitaku iu bashkua nismës si shkak i tematikës dhe mesazhit pozitiv.
“Me organizatën jam bashku, për arsye se e kam pa më shumë, punën që e kanë bërë, të rinjtë që e kanë bërë punën në këtë organizatë, për qytetin tonë, për fëmijët tanë. Më shumë e kam vërejtur punën tek projekti ‘Ec me këmbët e tyre’, një ngjarje që e kanë mbajt në shesh, në momentin që e kam parë gëzimin tek ata fëmijë, mu mu ka doktë diçka prekëse edhe shumë e mire. Kur ka ardhë projekti ‘Qyteti Miqësor’ për fëmijët kur e kam parë tematikën e këtij projekti, mu më ka bërë pak për vete kjo pjesë, edhe ngjarja te ‘Ec me këmbët e tyre, edhe komplet si projekti ‘Qytet Miqësor’’ për fëmijët”, shprehet Kaltrina.
Ndërsa, Kaltrina inkurajon të rinjtë të angazhohen në komunitet me veprime të mira personale edhe nëse nuk janë pjesë e organizatave.
“Mesazhi im për krejt të rinjtë që dëshirojnë me u bashku si me organizata si me aktivitete se nuk d.m.th veq me qenë pjesë e një organizate për me dhënë kontributin tënd për komunitetin, por varet edhe ti sa angazhohesh veç vetë, qoftë një ndihmë sado të vogël”, shtoi tutje ajo.
Ndërkaq, veprimtaritë e shoqërisë Oaktiv, kalojnë përtej projekteve materiale e sensibilizuese. Së fundmi Oaktiv ka inicuar edhe aktivitete të grupeve tjera shoqërore, siç janë edhe me Policinë e Kosovës, që ata të bëhen pjesë e forumeve diskutuese lidhur me tema të caktuara që preokupojnë këtë kategori së bashku me pjesën tjetër të shoqërisë për të cilën Rashiti pranoi edhe një dekoratë simbolike nga Policia në Podujevë.
kështu, jo vetëm në fillim, por mbështetja vetanake e anëtarëve të Oaktivit vazhdon. Në kuadër të zhvillimit të aktiviteteve të kësaj Organizata, Genc Rashiti përmes fondacionin “EDU Fondacion’ që financohet nga biznesi i tij privat ndan tre mijë euro duke ua mundësuar 60 personave mësime falas në linguistikë, inovacion dhe trajnime. Por jo vetëm kaq!
“EDU-ja një pjesë të hapësirës e garanton për krejt OJQ-të e Podujevës, për krejt aktivitetet e e shoqërisë civile në Podujevë. Është kjo salla përballë neve që ju ofrohet krejt organizatave në shfrytëzim e në këmbim të saj nuk kërkohet pagesë për krejt organizatat që veprojnë ose janë me bazë në Komunën e Podujevës. Ne si Oaktiv për rreth tri ose katër vjet kemi funksionuar nëpër kafene. Zyra jonë, instituti jonë, vendi ku ne kemi trajtu gjërat, ka qenë kafeneja. Duke e kuptuar këtë pjesë, ne e kemi kuptuar se me çka përballen organizatat e reja në Podujevë edhe ka qenë iniciativë që EDU-ja në këtë rast t’ia ofrojë shoqërisë civile në shfrytëzim. Kjo salla, se ku jemi tash duke mbajtur intervistën, është sallë e Oaktivit dhe i garantohet puna Oaktivit me orar ditor”, shpjegoi Genci.
Paragjykimiet, e ngecjet janë pjesë e çdo pune, por këto Genci nuk i shesh si arsye për të ndaluar veprimtaritë e veta vullnetare për shoqërinë e qytetin ku ai jeton.
“Në këtë pjesë shpesh herë të shkon mendja, kur ti gjykohesh, lodhesh me një aktivitet, kur një aktivitet nuk u shku qysh ke dasht ose planifiku, por e bëjmë një pushim të shkurtër edhe të nesërmën vazhdojmë me vullnetin e njëjtë. Oaktivi po i bënë 5 vjet që funksionon në Podujevë, edhe pa bazament, pa bazë të sigurt që ka me vazhdu tutje, asnjëherë nuk mendoj me u tërhheq dhe me u marrë me veten, për arsye se edhe ato 5 vite kanë qenë, 5 vite të miat, edhe të kontributit që e kam bërë për qytetin për organizatën edhe shoqërinë civile në tërësi në Podujevë. Të rinjve ju bëj thirrje, te pjesa e angazhimit qytetar, me e kuptu rëndësinë e angazhimit jo veç për komunitetin. Unë asnjëherë nuk bëhem hipokrit me thënë që unë kam mendu vetëm per komunitete edhe kontributi u kane vetem per komunitet. Tu qenë pjesë edhe vetë komunitetit vetë ky kontribut që e kam bërë për komunitet ka qenë kontribut edhe për mua. Te unë ka ndiku jashtëzakonisht shumë në zhvillimin e shkathtësive të mia”, përfundoi ai.
Edhe pse secila veprimtari ka vështirësitë e veta, organizatat e shoqërisë civile janë ato që zakonisht kapërcejnë kulmet e sfidave për të mbijetuar, por vullneti dhe dëshira për të parë ndryshime dhe për të pasur një impakt pozitiv në shoqëri bën që të vazhdohet tutje drejt sukseseve kolektive, e siç thotë edhe Genci drejt rritjes së vetëbesimit personal për të bërë gjëra të mëdha. /Katror.info
Edicionin #36 të plotë e gjeni KËTU 🙂
Përgatiti:
