“Wonderwoods” është dizajni më i fundit i një “kulle të gjelbër” në Holandë nga arkitekti italian i vlerësuar me çmime Stefano Boeri.
Ai fillon me një kaçubë rrush pa fara dhe një pemë dardhe: e para nga 300 pemët dhe 10,000 bimët që do ta kthejnë këtë bllok kulla holandeze në një pyll të gjallë, shkruajnë mediat e huaja, përcjell Telegrafi.
Utrecht është qyteti i fundit që ka marrë një “trajtim” të tillë nga arkitekti i njohur Stefano Boeri.
Mundesh me e lexu edhe…
Bëhet fjalë për arkitektin 66-vjeçar italian i cili shtriu imagjinatën e botës me pyllin e tij të parë vertikal në Milano një dekadë më parë.
Bosco Verticale në distriktin Porta Nuova frymëzoi një gjeneratë të re projektesh ripyllëzimi urban dhe praktika e arkitekturës së Boeri që atëherë ka përhapur dizajnin shumë gjerë – nga Italia në Francë, Zvicra në Shqipëri, Kajro dhe Dubai.
“Wonderwoods Vertical Forest” po zë rrënjë në lagjen e Utrecht midis Croeselaan dhe Jaarbeursboulevard dhe do të jetë gati për banorët deri në verën e vitit 2024.
“Do të jetë një model i integrimit të virtytshëm midis arkitekturës dhe natyrës së gjallë, i cili shpresojmë të jetë një instrument që do të përdoret për t’i bërë qytetet gjithnjë e më të gjelbërta”, thotë arkitektja Francesca Cesa Bianchi, partnere dhe drejtore e projektit në Stefano Boeri Architetti.
Cilat janë përfitimet e ndërtesave vertikale pyjore?
Me 300 pemë të 30 llojeve të ndryshme në fasadën e saj dhe mijëra bimë, kulla do të mbajë të njëjtën bimësi si një hektar pyll, shkruan Euronews, përcjell Telegrafi.
Ky ekosistem urban është i aftë të prodhojë rreth 41 ton oksigjen çdo vit, vlerësojnë arkitektët, ndërsa thith CO2 dhe kap grimcat e imta të pluhurit.
Përveç pastrimit të ajrit, bimët zbutin ndotjen akustike të qytetit.
Veç kësaj, në verë, hija e gjetheve të saj zvogëlon efektin e nxehtësisë – duke ulur temperaturën në fasada dhe brenda ndërtesës.
Kjo ka një ndikim të rëndësishëm në mikroklimën lokale dhe mirëqenien e banorëve, veçanërisht pasi rreziku i valëve të të nxehtit rritet për shkak të ndryshimeve klimatike.
Njerëzit do të ndjejnë gjithashtu përfitimin e kursimit të energjisë, pasi nevojitet më pak ajër i kondicionuar.
Atje, një grup ‘kopshtarësh fluturues’ nga Royal Ginkel Group do të zbresin nga maja e ndërtesës për t’u kujdesur për “banorët jo-njerëzorë” të kullës, siç ndodh sot në Bosco Verticale të Milanos.
Për kë është Wonderwoods Vertical Forest?
Projekti Wonderwoods përbëhet nga dy kulla, 105 dhe 70 metra të larta, të cilat do të strehojnë rezidenca dhe zyra. Është kulla më e lartë (Kulla A), e cila do të bëhet një pyll vertikal.
Në përgjithësi, hapësira do të ketë 200 apartamente të llojeve të ndryshme dhe 15,000 metra katrorë zyra.
“Pylli Vertikal Wonderwoods është një projekt për të cilin jemi veçanërisht krenarë, pasi do të presë funksione të hapura si për qytetin ashtu edhe për banorët”, thotë Cesa Bianchi.
“Në këtë mënyrë, do të kontribuojë në zgjerimin e njohurive për pyllëzimin urban dhe vertikal, duke u mundësuar gjithnjë e më shumë përdoruesve të përfitojnë nga efektet pozitive që lidhen me afërsinë me bimët dhe pemët”.
Sidoqoftë, Utrecht nuk është qyteti i parë holandez që ka një pyll vertikal. Ndër projektet e tjera nga Stefano Boeri Architetti është Pylli Vertikal Trudo i cili u ndërtua në Eindhoven në vitin 2021.
Pylli vertikal i Eindhoven ishte i pari në botë që ofroi strehime me qira të reduktuara dhe të dizajnuara për të mirëpritur të rinjtë dhe studentët./Katror.info
Përgatiti:
