Qeveria e Kosovës ka miratuar propozim-vendimin për themelimin e Këshillit Organizativ për shënimin e 12 qershorit, Ditës së Çlirimit të Kosovës, shkruan Katror.info.
Organizimi i 26-vjetorit të Çlirimit do të bëhet në kuadër të Zyrës së Kryeministrit, ndërsa kryesues i këshillit do të jetë ministri i Kulturës, Rinisë dhe Sportit, Hajrullah Çeku.
Kosova më 12 qershor shënon 26-vjetorin e Ditës së Çlirimit, kur trupat paqeruajtëse të NATO-s hynë në vend pas fushatës ajrore kundër caqeve ushtarake dhe policore serbe. Në kuadër të vendimeve të tjera, Qeveria ka emëruar Ridvan Hotin në pozitën e Zëvendësdrejtorit Ekzekutiv për Trajnimin e të Burgosurve në Shërbimin Korrektues të Kosovës dhe Irfan Lipovicën në pozitën e Drejtorit të Përgjithshëm në Drejtorinë e Përgjithshme të Akreditimit, pasi ai u rendit si kandidati me më së shumti pikë të grumbulluara, me gjithsej 89.9 pikë.
Mundesh me e lexu edhe...
Po ashtu, është aprovuar analiza juridike për thjeshtimin, bashkimin ose eliminimin e lejeve dhe licencave të lëshuara nga institucionet rregullatore si Autoriteti i Aviacionit Civil, Banka Qendrore e Republikës së Kosovës, Zyra e Rregullatorit të Energjisë, Autoriteti i Hekurudhave të Kosovës, Autoriteti Rregullativ i Komunikimeve Elektronike dhe Postare, Autoriteti Rregullativ i Shërbimeve të Ujit, Komisioni i Pavarur për Media dhe Komisioni i Pavarur për Miniera dhe Minerale.
Qeveria ka anuluar pjesërisht vendimin përfundimtar të datës 18 prill 2019 për ndërtimin e rrethrrotullimit në Gjilan, duke u bazuar në elaboratin e ri të shpronësimit të përgatitur nga Drejtoria për Kadastër. Gjithashtu, është miratuar Raporti i Përgjithshëm Vjetor mbi Inspektimet dhe janë aprovuar Udhëzuesit për Inspektimet e Përbashkëta, me qëllim avancimin e mbikëqyrjes ligjore dhe promovimin e pajtueshmërisë me standardet rregullative.
Në mbledhjen e sotme është plotësuar dhe ndryshuar vendimi i Qeverisë i datës 21 mars 2025 për emërimin e komisionit ad hoc për vlerësimin profesional për pranimin në pozitat e larta drejtuese në Agjencitë Ekzekutive të Ministrisë së Punëve të Brendshme. Me këtë ndryshim, kryesuesja Afërdita Bekaj është zëvendësuar nga Lumnije Demi./Katror.info
Përgatiti:
