Qendra Kombëtare për Menaxhim të Kufirit (QKMK) ka publikuar sot një njoftim të rëndësishëm për qytetarët e Republikës së Kosovës, duke i kujtuar ata të respektojnë me përpikëri rregullat për hyrje dhe qëndrim në zonën Shengen, në kuadër të udhëtimit pa vizë që nga janari 2024, shkruan Katror.info.
Sipas QKMK-së, për të hyrë në zonën Shengen, qytetarët e Kosovës duhet të kenë një pasaportë biometrike të vlefshme së paku tre muaj pas datës së daljes nga zona Shengen. Pasaportat jo-biometrike nuk pranohen për udhëtim pa vizë.
Qëndrimi i lejuar është deri në 90 ditë brenda çdo periudhe 180-ditore, dhe qëllimi i vizitës duhet të jetë turizëm, biznes, vizita familjare ose pjesëmarrje në ngjarje afatshkurtra si konferenca apo seminare.
Mundesh me e lexu edhe…
Qendra thekson se udhëtimi pa vizë nuk është i lejuar për punësim, studime afatgjata apo qëndrim të përhershëm — për këto qëllime kërkohet vizë nacionale (tip D) nga ambasadat përkatëse.
Megjithëse qytetarët nuk kanë nevojë për vizë për të hyrë në Shengen, autoritetet kufitare mund të kërkojnë dokumente shtesë në kufi, si:
- Biletë kthimi,
- Rezervim akomodimi ose ftesë nga një mik/familjar,
- Dëshmi financiare,
- Sigurim shëndetësor udhëtimi (i rekomanduar fuqishëm).
QKMK përkujton se udhëtimi pa vizë vlen për të gjitha 27 shtetet e zonës Shengen, përfshirë Gjermaninë, Francën, Italinë, Zvicrën, Spanjën, Belgjikën, Suedinë, dhe vendet e tjera anëtare, si dhe për Islandën, Norvegjinë, Lihtenshtajnin dhe Zvicrën (edhe pse nuk janë pjesë e BE-së).
Ndërkohë, ky regjim nuk vlen për Irlandën dhe Mbretërinë e Bashkuar, të cilat nuk janë pjesë e zonës Shengen./Katror.info
