Me pankarta në duar dhe një zë të përbashkët, mijëra qytetarë të Ulqinit, përfaqësues të të gjitha forcave politike dhe anëtarë të shoqërisë civile u mblodhën gjatë të shtunës në një protestë masive kundër vendimit të qeverisë malazeze për dhënien me qira të një pjese të bregdetit për investitorë të huaj, shkruan Katror.info.
Protesta, e cila përfundoi pa incidente, u zhvillua para mbledhjes solemne të Kuvendit Komunal të Ulqinit, që për herë të parë u mbajt në shesh, përpara qytetarëve, si simbol i transparencës dhe kundërshtimit institucional ndaj këtij vendimi të kontestuar.
Sipas marrëveshjes së bërë publike nga autoritetet shtetërore, rreth 12 kilometra vijë bregdetare, përfshirë Plazhin e Madh – një prej pasurive natyrore dhe kulturore më të çmuara të Ulqinit – pritet t’u jepen me qira për 99 vjet investitorëve nga Lindja e Mesme.
Mundesh me e lexu edhe...
Komuna e Ulqinit, organizatore e protestës, ka theksuar se vendimi është marrë pa përfshirjen e autoriteteve lokale dhe pa një proces transparent konsultimesh me komunitetin. Në një deklaratë zyrtare, komuna vlerësoi protestën si një reagim qytetar ndaj “tentativës për shitjen dhe privatizimin e pasurive publike”.
“Plazhi i Madh nuk është vetëm një aset ekonomik, por edhe një simbol identitar i Ulqinit dhe banorëve të tij. Nuk do të lejojmë që kjo pasuri të jepet për interesa të huaja pa marrë mendimin dhe pëlqimin e qytetarëve”, thuhet në deklaratën e komunës.
Protesta e sotme shënon gjithashtu anulimin e festimeve tradicionale për Ditën e Ulqinit, për t’i dhënë përparësi një zëri të bashkuar në mbrojtje të bregdetit dhe pronës publike. Prania e spektrit të gjerë politik dhe qytetarëve nga të gjitha trevat e Malit të Zi u pa si një tregues i qartë i rëndësisë që ky çështje ka për komunitetin.
Organizatorët paralajmërojnë se protesta do të vazhdojë me forma të tjera demokratike presioni, nëse qeveria nuk tërhiqet nga vendimi për dhënien me qira të bregdetit./Katror.info
Përgatiti:
