Qytetet kanë personalitet, ashtu si njerëzit, dhe ndërsa secili është unik dhe i shkëlqyer në mënyrën e vet, të mbërrish në një vend të ri dhe të përshëndetesh me krahë të hapur është një ndjenjë e ëndërruar për çdo udhëtar.
Pas një hulumtimi të kryer nga Time Out për qytetet më të ndryshme dhe më gjithëpërfshirëse, ku u vlerësuan Londra, Brighton, Melbourne dhe New York si destinacionet më mikpritëse, tani një listë e re ka sjellë të dhëna të reja për vendet më miqësore në botë.
Çmimet e 14-ta vjetore të “Traveller Review Awards” nga Booking.com kanë bazuar renditjen në mbi 370 milionë komente të verifikuara online. Në krye të listës u shpall Montepulciano, një qytet i vogël mesjetar në majë të një kodre në Toskana jugore, si vendi më mikpritës në botë.
Mundesh me e lexu edhe...
Me vetëm rreth 14,000 banorë, Montepulciano ka bërë nga turizmi një shtyllë të rëndësishme të prosperitetit ekonomik gjatë 60 viteve të fundit, ndaj nuk është çudi që vizitorët ende mirëpriten ngrohtësisht. Qyteti është gjithashtu miqësor për këmbësorët, me shumë rrugë pa makina, ka arkitekturë tipike të Rilindjes dhe mban të njëjtin emër me një verë të kuqe të shijshme – një ndalesë ideale për një udhëtim rrugor nëpër qytetet e bukura italiane.
Në vendin e dytë renditet Magong në Tajvan, ndërsa vendi i tretë i takon San Martín de los Andes në Argjentinë. Por, më poshtë gjeni top 10 qytetet më mikpritëse, të cilat, megjithëse më pak të njohura, janë vërtet të vlefshme për t’u vizituar.
Top 10 qytetet më mikpritëse në botë (sipas Booking.com)
- Montepulciano, Itali
- Magong, Tajvan
- San Martín de los Andes, Argjentinë
- Harrogate, Britani e Madhe
- Fredericksburg, Texas, SHBA
- Pirenópolis, Brazil
- Swakopmund, Namibi
- Takayama, Japoni
- Noosa Heads, Australi
- Klaipeda, Lituani
Burimi: Time Out
Përktheu dhe përshtati: Katror.info
