Kryetari i Odës Ekonomike të Kosovës (OEK), z. Lulzim Rafuna, ka zhvilluar sot një takim të rëndësishëm me Komisioneren Evropiane Marta Kos, në kuadër të një delegacioni të përbashkët me Presidentin e Eurochambres, Vladimir Dlouhy, dhe kryetarët e odave ekonomike të vendeve kandidate dhe potenciale për anëtarësim në Bashkimin Evropian, shkruan Katror.info.
“Sot, së bashku me Presidentin Vladimir Dlouhy të Eurochambres dhe përfaqësuesit e tjerë të odave ekonomike, zhvilluam një dialog mjaft produktiv me Komisioneren Marta Kos, ku theksuam rolin thelbësor të Odave Ekonomike në përparimin e procesit të zgjerimit të BE-së,” deklaroi Kryetari Rafuna pas takimit.
Ai vuri në dukje rëndësinë e veçantë që ky dialog ka për Kosovën, në një kohë kur vendi synon një integrim më të ngushtë me Bashkimin Evropian. Gjatë diskutimeve, u theksua veçanërisht rëndësia e Planit të Rritjes së BE-së për Ballkanin Perëndimor si një mundësi për nxitjen e zhvillimit ekonomik dhe reformave strukturore në rajon.
Mundesh me e lexu edhe…
Megjithatë, Kryetari Rafuna ngriti shqetësimet rreth masave ndëshkuese politike dhe ekonomike të vendosura nga BE ndaj Kosovës, të cilat, sipas tij, pengojnë drejtpërdrejt zhvillimin ekonomik dhe përpjekjet për integrim evropian.
“Plani i Rritjes së BE-së për Ballkanin Perëndimor ka për qëllim rritjen ekonomike të rajonit, përfshirë edhe Kosovën. Nga ana tjetër, masat ndëshkuese ndaj Kosovës janë në kundërshtim me këtë qëllim dhe ndikojnë negativisht në përfshirjen tonë të plotë në tregun evropian,” tha Rafuna. Ai shtoi se heqja e këtyre barrierave është thelbësore jo vetëm për drejtësi ekonomike, por edhe për stabilitetin dhe prosperitetin e vendit.
Në fund, Kryetari Rafuna konfirmoi përkushtimin e Odës Ekonomike të Kosovës për të qenë një partner kyç i Komisioneres Evropiane dhe institucioneve të BE-së, duke kontribuar në harmonizimin e ekonomisë kosovare me standardet evropiane.
Ky takim shënon një hap të rëndësishëm në forcimin e bashkëpunimit ekonomik midis Kosovës dhe Bashkimit Evropian dhe nënvizon rëndësinë e përfshirjes aktive të bizneseve në procesin e integrimit evropian./Katror.info
