Administrata Tatimore e Kosovës (ATK) ka marrë vlerësime pozitive nga Komisioni Evropian në Raportin e vitit 2025, për rritjen e të hyrave, luftën kundër evazionit fiskal dhe avancimin në digjitalizimin e shërbimeve.
Në Kapitullin 16, që trajton politikat tatimore dhe bashkëpunimin administrativ, Komisioni Evropian konstaton se Kosova ka arritur “nivel të qëndrueshëm përgatitjeje”, duke shënuar progres të dukshëm në kontrollet e bazuara në rrezik, formalizimin e ekonomisë dhe përmirësimin e përmbushjes tatimore.
Sipas raportit, të hyrat e ATK-së kanë arritur mbi 977 milionë euro, që paraqet një rritje prej 11.6% krahasuar me vitin e kaluar. Gjatë periudhës raportuese, janë mbledhur 179 milionë euro borxh tatimor, me një rritje prej 8% krahasuar me vitin 2024. Po ashtu, kërkesat për rimbursim të TVSH-së janë trajtuar mesatarisht brenda 25 ditësh, ndërsa janë avancuar rregullat për Transferimin e Çmimeve në përputhje me udhëzimet e OECD-së.
Mundesh me e lexu edhe…
Raporti vlerëson përparimin në menaxhimin e rrezikut të përmbushjes, digjitalizimin e shërbimeve, si dhe zgjerimin e bashkëpunimit ndërinstitucional në luftën kundër evazionit fiskal dhe pastrimit të parave.
Megjithatë, Komisioni thekson nevojën për forcimin e kapaciteteve profesionale, modernizimin e teknologjisë së informacionit dhe përmirësimin e vlerësimit të hendekut tatimor.
Në reagimin e saj, ATK ka theksuar përkushtimin për të vazhduar ndërtimin e një administrate moderne, transparente dhe në përputhje me standardet evropiane, duke theksuar rolin e saj të rëndësishëm në forcimin e sistemit fiskal të vendit./Katror.info
