Rea Gashi dhe Ermira Topalli krahas tre garuesve tjerë kosovarë për herë të parë morën pjesë në garën ndërkombëtare FIA Motorsport Games në Marsejë të Francës.
Në disiplinën karting – sllallom, Kosova u prezantua nga Rea Gashi dhe Baran Karabeg. Të dy garuesit e dhanë maksimumin dhe në fund u renditën në pozitën e dhjetë.
“Ka qenë një eksperiencë e jashtëzakonshme, aq më tepër për faktin se për mua ishte hera e parë që marr pjesë në një garë kaq serioze. Atmosfera, ambienti, organizimi e çdo tjetër ishte në nivel të lartë dhe kisha shumë emocion. Unë kam filluar vonë të merrem me karting dhe përvoja ime është e shkurtë, por gjithsesi ia dola të menaxhoj mirë stresin. Mendoj se pozita e 10-të është rezultat i mirë“, ka thënë Rea për faqen zyrtare të FASK-ut, në Facebook.
Mundesh me e lexu edhe…
Ajo është shprehur optimiste se në të ardhmen do të ketë suksese edhe më të mëdha.
“Shpresoj që ky është vetëm fillimi i sukseseve të mia. Në garat e ardhshme synoj të jem në podium, e pse jo edhe të fitojë, sidomos duke marrë parasysh se shpirtin luftarak e kam trashëguar nga babi, karriera e të cilit në auto sport është shumë e pasur”, është shprehur Rea.
Ermira Topalli e përfaqësoi Kosovën në disiplinën e auto sllallomit.
Ermira e ka përshkruar me shumë emocion këtë garë, ndërsa, pavarësisht paraqitjes shumë të mirë, beson që në të ardhmen rezultatet të jenë edhe më të mira.
“Ka qenë një përvojë shumë e veçantë. Për mua ishte hera e parë që marr pjesë në një garë jashtë vendit, ishte hera e parë që garoj me veturë sportive, e dedikuar për gara dhe ‘full electric’. Megjithatë, duke marrë parasysh konkurrencën që ishte shumë e fortë, mendoj se kemi pasur paraqitje të mirë”, ka thënë Ermira për faqen zyrtare të FASK-ut në Facebook.
Ajo është shprehur e fascinuar me organizimin e këtij eventi. “Gjithçka ka qenë shumë mirë. Ka pasur pjesëmarrës nga e mbarë bota, ndërsa organizimi ishte i shkëlqyeshëm. Thjesht, ishte një përvojë që nuk harrohet, ndërsa neve na mbetet të punojmë edhe më tepër, në mënyrë që në garat e ardhshme të arrijmë rezultate edhe më të mira”, ka shtuar Ermira Topalli.
Së bashku me të, në disiplinën e auto sllallomit, ishte edhe Valon Jaha, ndërsa Kosova u rendit në pozitën e 10-të, që gjithsesi është rezultat i mirë.
Në një konkurrencë shumë të fortë, në të cilën morën pjesë 72 shtete nga e mbarë bota (përfshirë të gjitha disiplinat), garuesit kosovarë patën paraqitje mjaft të mirë, aq më tepër duke marrë parasysh se ishte hera e parë që marrin pjesë në një format të tillë.
Në Marsejë ishte edhe Visar Gjikolli, i cili Kosovën e përfaqësoi në E-Sports dhe pavarësisht faktit që nuk arriti të futej në bllokun final, pati paraqitje shumë të mirë, duke marrë parasysh se konkurrenca në këtë disiplinë ishte jashtëzakonisht e forte, ka shkruar FASK në Facebook./Katror.info
Përgatiti:
