Një rrufe që përshkoi një distancë prej 829 kilometrash ka vendosur rekordin e ri botëror për gjatësinë më të madhe të regjistruar ndonjëherë. Ky fenomen meteorologjik i jashtëzakonshëm kapërceu me 61 kilometra rekordin e mëparshëm të vendosur në vitin 2020.
Ky zbulim u bë i ditur nga Organizata Botërore Meteorologjike (OBM), e cila e konfirmoi matjen përmes satelitëve GOES-16 dhe GOES-17 të administruar nga NOAA (Administrata Kombëtare Oqeanike dhe Atmosferike e SHBA-së). Matjet përfundimtare u publikuan në Buletinin e Shoqatës Amerikane të Meteorologjisë.
Rrufeja ndodhi në tetor të vitit 2017, por përmasat e saj rekorde u zbuluan vetëm pas një analize më të thelluar të të dhënave. Ajo përshkoi një rrugë të gjatë nga Lindja e Teksasit deri në Kansas City – një distancë sa ajo midis Parisit dhe Venecias.
Mundesh me e lexu edhe…
Për krahasim, një makinë do të duhej rreth 8 deri në 9 orë për ta përshkuar këtë distancë, ndërsa një avion komercial të paktën 90 minuta.
Sipas OBM-së, ky lloj i rrufesë përbën rrezik të lartë për sigurinë publike, aviacionin dhe mjedisin, pasi shkarkesat elektrike të kësaj natyre mund të shkaktojnë zjarre dhe incidente të tjera të rrezikshme.
Sekretarja e Përgjithshme e OBM-së, Celeste Saulo, theksoi nevojën për sisteme të avancuara të paralajmërimit të hershëm për t’i paraprirë këtyre fenomeneve natyrore të rrezikshme./Katror.info
