Këtë javë e kemi listën plot! Nëse doni muzikë klasike, Filharmonia ka koncert me dirigjentin italian Jacopo Sipari di Pescaseroli dhe violinisten shqiptare Abigeila Voshtina; nëse doni muzikë elektronike, Episode feston 23-vjetorin me DJ-të Likatek dhe Besa Mati, si dhe DeusExMachina, Çuç dhe Leart Rama. Nëse doni me pa ekspozita, keni llojllojshmëri në përzgjedhje të Buron Kacelit në Galerinë Qahili në Prishtinë; Zanita Halimin në bibliotekë “Hivzi Sylejmani” poashtu në Prishtinë si dhe Ardian Isufin në galerinë GOCAT në Tiranë.
Ben Blushi e promovon romanin e tij të ri (për të cilin kemi shkruar edhe këtu) në Klan Arena. Delirio, një kolektiv që prodhon ngjarje audio-vizuele e feston Shën Valentinin në AMC Hall, ndërsa Puka e Shqipnisë ju fton me një festival dimnor Puka N’Fest. E masi osht ftohtë, ju rekomandojmë në festival t’veshni balaklavat dhe kapelat tepër t’bukura të studios Rruzëpija nga Shkupi.
Gjithçka, për gjithkond, prej Prishtinës deri në Pukë.
Mundesh me e lexu edhe…
Me pa: “Arti i Kallnorit: Buron Kaceli.”, Galeria Qahili, Prishtinë
Galeria Qahili e çel 2025 me ekspozitën me titullin e përshtatshëm “Arti i Kallnorit: Buron Kaceli.” (Kallnor osht emni i bukur i moçëm i muajit janar). Hapja e ekspozitës osht me 16 janar, nga ora 19:30, në Galerinë Qahili. Kuratore e ekspozitës osht Nita Qahili. Sipas tekstit kuratorial, kjo ekspozitë “hulumton konceptin e lëvizjes në art dhe shqyrton se si figura njerëzore në piktura tërheq sjelljen e shikimit. ‘Arti i Kallnorit’ është një kremtim i fillimit të Vitit të Ri, një mundësi për mu riformu dhe frymëzu nga arti dhe kultura. Sjell një ritëm të ri, tu v’nu në qendër jo vetëm veprat artistike, por edhe reflektimin mbi lëvizjet dhe sjelljet e shoqnisë në një moment transformus.”
Me dëgju: Orkestra Filharmonike e Kosovës me dirigjent Jacopo Sipari di Pescaseroli, Pallati i Rinisë, Prishtinë
Orkestra e Filharmonisë së Kosovës poashtu e çel sezonin e ri me koncertin e parë i cili do të mbahet më 17 janar 2025. Koncerti ka dy mysafirë: do të drejtohet nga Jacopo Sipari, një prej dirigjentëve ma premtues të ri në botën e operës italiane, me referencë të veçantë për muzikën e Puccinit, për t’cilën në vitin 2024 mori titullin “Ambasador Puçinian në botë”, dhe violinistja shqiptare Abigeila Voshtina, e cila osht edhe drejtoreshë e përgjithshme e Teatrit Kombëtar të Operës, Baletit dhe Ansamblit Popullor. Programi ka mu hapë me uverturën “Finlandia” nga Jean Sibelius, për me vazhdu me koncertin për violinë të kompozitorit Max Bruch dhe do të përmbyllet me poemën simfonike “Isle of the Dead” të Sergei Rachmaninoff-it, një vepër e frymëzume nga piktura e artistit të famshëm zviceran Arnold Böcklin.
Me k’cy: 23 Vite Episode, Zone Club, Prishtinë
Me dije tonë, seria e eventeve të muzikës elektronike Episode, ja ka nisë në Queen’s (dmth Kurrizi, Santea e k’to), po tu fol me Likën, themeluesin e Episode, e kuptum që në Queen’s, Likatek i bojke partyt hala pa e marr emnin Episode. Kështu që historia e vërtetë e Episode fillon prej vizitës së DJ Marco Lenzi në Tube Club në 2001, me vazhdu mandej në Underclub, Base Club dhe tutje në Spray, etj, etj. Pionerët fillestarë ishin edhe Naka dhe Uki.
Me këqyr hollë-e-hollë, t’u iu falenderu krejt ktyne, sot jemi ku jemi me skenën e clubbingut në Kosovë, që tash njihet si një pjesë e pazavendësushme e skenës muzikore dhe kulturore. E tash në Zone e keni përvjetorin e 23-të të Episode, natyrisht me Likatek dhe Besa Mati, si dhe DeusExMachina, Çuç dhe Leart Ramën. Seri e mirë, gati një çerek shekulli e gjatë, me plot sfida dhe gëzime, me plot personazhe dhe karaktere, me plot mysafirë nga bota… Urime Likës & ekipit, edhe neve për besë :).
Me pa: Ekspozitë “Pas kujtesës” nga Zanita Halimi, Biblioteka Hivzi Sylejmani, Prishtinë
Fondi për të Drejtën Humanitare Kosovë po e organizon ekspoziten ‘Pas Kujtesës’ nga autorja Zanita Halimi më 15 janar nga ora 17:00, në Bibliotekën ‘Hivzi Sulejamani’. Sipas organizatorëve, “Pas Kujtesës” përshkrun marrëdhanjen që e ka pas brezi i fëmive të lindun mas luftës, me përvojat e plota, shpesh traumatike, që i kanë paraprirë lindjeve të tyre. Pra, me përvojat që ata “kujtojnë” vetëm me anë të tregimeve, imazheve dhe sjelljeve mes të cilave ata u rritën. Këto përvoja iu transmetun atyne aq thellë dhe me emocion sa që dukej se përbanin kujtime me vete.”
Me pa: Ekspozita “UFO: Unidentified False Objects” nga Ardian Isufi, Galeria GOCAT, Tiranë
Tirana e ka një galeri relativisht të re me emnin Gallery of Contemporary Arts Tirana, dhe akronim të lezeçëm GOCAT, e hapun prej Fondacionit Mane. Një ekspozitë që na ka ra në sy osht e artistit Ardian Isufi që titullohet “UFO: Unidentified False Objects”. Galeria osht e çelun nga e marta në të dielë, në oraret: 10:00-14:00 dhe 17:00-20:30. Kërkimi artistik i Ardian Isufit nis nga çashtjet akute, njëfarë balanci koxha kreativ me media diverse, midis utopisë dhe distopisë. Sipas programit të ekpozitës: “Në këtë ekspozitë konceptuale, evolucionare në vendndodhje, përmbajtje dhe formë, tu përfshi një kombinim të mediumeve si video, instalacion e ndërhymje në hapësinë, ekspozita ‘UFO’ kthehet në një rrugëtim artistik, ku natyra shëtitëse dhe performuse e veprave ka një matricë të dallueshme bashkëkohore.” Prej bunkerave të betonit deri te video kreacione, diapazoni i veprave të ekspozume osht i gjanë e i thellë.
Me festu: Festivali dimnor Puka N’fest, Pukë
Puka osht një komunë e vockël veriore kah Shkodra. Por po e bon një festival t’mirë dimnor, me emnin “Puka N’fest” prej dates 17-19 janar. Borë ka, ka edhe panair të kulinarisë, panair të artizanatit, ka dy skena me muzikë elektronike dhe asi tjetër, përfshi shokun tonë DJ Mimi Kolaneci. Ka edhe hiking, paintball. Puka e bon edhe rakinë e mirë të manaferrës së egër të malit, kështu që atmosfera duhet mu konë e ngrohtë, përkundër dimnit të madh.
Me përjetu: Multimedia event “Delirio – Cupid’s Call”, AMC Hall, Prishtinë
Delirio osht një kolektiv nga Shqipnia që bon party me performanca, video art, ndriçim fenomenal, muzikë, dhe atmosferë të dhezun. Ngjarja do të zhvillohet më 14 Shkurt në AMC Hall, Prishtinë, dhe premton mu konë një natë që përzin dashninë me euforinë. Organizatorët ju ftojnë të “zhyteni në një botë tërheqëse të energjisë shpërthyse, atmosferës engjëllore dhe visualeve elektrizuese, teksa shpirti i pabesë i Kupidit merr kontrollin e stejxhit.” Pra, festoni dashninë, muzikën, artin ama a jeni gati m’u rrokë nga shigjeta e Kupidit?
Me marrë pjesë: Promovimi i romanit të Ben Blushit, Klan Arena, Prishtinë
Romanin e fundit të Ben Blushit e kemi rekomandu sapo osht botu, por tash botuesi dhe autori po organizojnë promovimin në Klan Arena, të mërkuren me 15 janar, prej orës 18:30. Ngjarja e librit ka një fije lidhshmërie me personazhin e romanit paraprak, por kësaj radhe kemi rrëfim dashnie (ose mosdashnie), seksit, inteligjencës artificiale, e stërpikun me debatin fetar ndër shqiptarët, politikëbërjen cinike, konflikte familjare dhe plot detalje tjera dendun të mshefuna në rreshtat e romanit “Parajsa Artificiale”. Blushi shkrun mirë, rrjedhshëm, ka pakëz jehonë te sendeve që i kemi lexu edhe te autorë e shkrime botnore, por gjithsesi me një vulë benblushiane të referencave kulturore e politike të këtij nënqielli…
Mu zbukuru: Aksesorët e modës nga studio Rruzëpija, Shkup
Qe disa sezona dimnore, koxha shumë jon flit balakllavat, tu i mbulu krytë e njerëzve stajlish nëpër rrugët të vendeve (apo në après-ski) ku osht pak ma ftoft. Edhe na v’nojshim k’tyne herë balaclava (a e din kush qysh i thojnë shqip?), gjithmonë t’u na kujtu fmininë e hershme se pa to s’ke mujt me dal prej shpisë.
Ama koha ka ardhë prapë me v’nu ballakllava sepse A) osht ftoftë jashtë dhe B) kanë dalë do ballaklava punëdore, edhe ato me rruza të marume me lezet prej dizajnerës Lumturie Qamili (emri artistik Temelura) dhe brandit të saj super cool Rruzëpija. Temelura osht e diplomume në “International Fashion Institute of Izet Curi – Paris”, bash për qet punë dhe ka një seri aksesorësh për kry, përfshi bereta, kapuça, etj. Ballakllavën e saj duhet me rujt me xhelozi, se osht e punume krejt me kërrabëza, me lesh t’mirë – plus tu shti rruza në pe, përnime. E bukur. Sexy. Plus praktike./Katror.info
Marrë nga Suzanne Podcast.
Përgatiti:
