“Ka nisur si hobi dhe tani më është bërë profesion, e dikur stil jete. Kam nisur kur nuk ka pasur as trepikësh, as semaforë, as kosh me faul. Kam vazhduar në ligat e një shteti që sot as nuk ekziston, dhe në ligat e një shteti që po e themelonim vetë, pa ditur kur ajo ëndërr do të realizohej. Kam luajtur në beton, në sallat e sporteve, në palestrat e shkollave fillore, kam transmetuar Ligën e Kosovës nga sallat e ftohta me telefon statik për radio. Kam transmetuar NBA-n dhe Lojërat Olimpike” – rrëfen Blerim Vuniqi, ish-basketbollist dhe gazetar sportiv me përvojë të gjatë në Kosovë, në episodin e dytë të dokumentarit “4 Çerekët”.
Në këtë episod vjen edhe rrëfimi i Resmije Junikut, një prej ikonave të basketbollit kosovar, e cila tregon momentin kur u largua nga Gjakova për t’u bërë pjesë e Universitetit të Prishtinës.
“E prej atij momenti, Ismeti kërkoi që unë të luaja për universitetin. M’u duk absurde! Me e lënë Gjakovën e me ardhë në Prishtinë. Por, u bë si u bë – ai inicioi shumë për ardhjen time, dhe unë, edhe si maturante, erdha në universitet. Nuk jam aspak pishman që kam ardhur, edhe pse kam pasur vështirësi – gjuhën nuk e dija fare, se në Gjakovë nuk flitej… Fatos Shitën e kisha përkthyes,” – kujton Juniku.
Mundesh me e lexu edhe…
Ajo rrëfen se loja në fushë ishte gjuha që e bëri të kuptohej me bashkëlojtaret dhe trajnerin. “Loja si lojë ka qenë e mirë, dhe ne e patëm suksesin në atë vit – në vitin ’73, te Shqipeniku, si lojtare e re që isha. Mund të them edhe këtë: të gjitha bashkëlojtaret e mia kanë qenë të kombësisë serbe – Jelica, Milica, Snezhana, Sonja. Në fillim nuk i kuptoja, por me kohë nisa ta mësoj edhe gjuhën,” – shton ajo.
Resmije Juniku është një nga figurat më të shquara të basketbollit kosovar. Ajo spikati si pjesë e Gjeneratës së Artë të Universitetit të Prishtinës në vitet ’70–’80, ndërsa në vitin 1984 u emërua kryetrajner i ekipit të UP-së. Për kontributin e madh në sport, është nderuar me Medaljen Presidenciale të Meritës.
Autor dhe producent i dokumentarit “4 Çerekët” është Leart Hoxha, me intervista të realizuara nga Blerim Vuniqi. Prodhimi është i Katror Media dhe mbështetet nga Ministria e Kulturës, Rinisë dhe Sportit./Katror.info.
