Agjencia e lajmeve Reuters është nderuar me Çmimin Pulitzer për gazetari hulumtuese për një seri artikujsh që zbuluan në detaje tregtinë ndërkombëtare të kimikateve që përdoren për të prodhuar fentanil – një drogë sintetike që ka shkaktuar mbi 450,000 viktima në Shtetet e Bashkuara, shkruan Reuters, transmeton Katror.info.
Seria me shtatë pjesë, e titulluar “Fentanyl Express”, tregoi se si kimikatet kineze që furnizojnë këtë tregti janë të lira, të lehta për t’u siguruar dhe shumë pak të kontrolluara nga autoritetet. Gazetarët e Reuters blenë për vetëm 3,600 dollarë përbërës dhe pajisje të mjaftueshme për të prodhuar deri në 3 milionë dollarë drogë, duke demonstruar lehtësinë me të cilën mund të realizohet ky proces. Sigurisht, gazetarët nuk e prodhuan drogën dhe u kujdesën për asgjësimin e sigurt të materialeve të blera.
Hetimi u zhvillua nga një ekip gazetarësh ndërkombëtarë të vendosur në SHBA, Meksikë, Kinë dhe vende të tjera, të cilët zbuluan edhe rolin e ndërmjetësve meksikanë që ndihmojnë kartelet e drogës, si dhe përpjekjet e pafrytshme të qeverisë kineze për të kufizuar këtë tregti. Gjithashtu, një pjesë e serisë theksonte rolin jetik të ilaçit naloxone, që po shpëton mijëra jetë në SHBA, por që nuk e zgjidh vetë krizën e varësisë.
Mundesh me e lexu edhe…
“‘Fentanyl Express’ është dëshmi e fuqisë së gazetarisë hetimore për të zbuluar të vërteta të pakëndshme dhe për të kërkuar përgjegjësi. Jam krenare për ekipin që e solli këtë histori me aq thellësi dhe ndjeshmëri” tha kryeredaktorja e Reuters, Alessandra Gallon.
Kjo është hera e 13-të që Reuters fiton një Çmim Pulitzer që nga viti 2008.
Fitues të tjerë: New York Times, The New Yorker dhe Washington Post
New York Times u vlerësua me katër çmime Pulitzer, duke e çuar totalin e saj në një rekord prej 139 çmimesh që nga viti 1917. Këtë vit, Times u shpërblye për:
- Fotolajmin, me imazhet e Doug Mills që kapën momentin dramatik të atentatit ndaj Donald Trump në korrik 2024;
- Gazetari shpjeguese, për analizën e gjerë mbi luftën në Afganistan;
- Raportim ndërkombëtar, për mbulimin e konfliktit në Sudan nga gazetari Declan Walsh;
- Raportim lokal, në bashkëpunim me organizatën Baltimore Banner, për hetimin mbi ndikimin e fentanilit te komuniteti afro-amerikan në qytetin e Baltimores, sidomos te meshkujt e moshuar.
The New Yorker fitoi tre çmime, përfshirë:
- Komentin më të mirë,
- Fotografitë më të spikatura në një reportazh,
- Raportimin më të mirë audio.
Washington Post fitoi dy çmime Pulitzer. I pari ishte për raportim të lajmeve të fundit, gjithashtu mbi atentatin ndaj Trumpit. I dyti i shkoi karikaturistes Ann Telnaes, e cila dha dorëheqje pas refuzimit të një karikature ku paraqitej pronari i gazetës, Jeff Bezos, duke u përkulur përpara një statuje të Trumpit. Juria e përshëndeti “guximin e saj profesional”.
Të tjera çmime të rëndësishme:
- ProPublica mori çmimin për shërbim publik, për hetimin mbi gratë shtatzëna që humbën jetën për shkak të kufizimeve të rrepta të ligjeve për abortin.
- Wall Street Journal u shpërblye për raportim kombëtar, për një profil të detajuar të Elon Musk dhe ndikimit të tij në politikën dhe administratën amerikane.
- Një citim i veçantë iu dha post-mortem gazetarit Chuck Stone, për punën e tij në mbështetje të të drejtave civile dhe komunitetit afro-amerikan.
Në fushën e arteve dhe letrave:
- Percival Everett fitoi në kategorinë e letërsisë artistike me romanin James, që i jep zë personazhit Jim nga “Huckleberry Finn”;
- Edda L. Fields-Black fitoi për histori, me një libër mbi jetën e Harriet Tubman;
- Branden Jacobs-Jenkins u nderua me çmimin për dramaturgji, për veprën Purpose, që trajton jetën dhe dilemat e një familjeje të klasës së mesme afro-amerikane. /Katror.info
Përgatiti:
