Kosova, e sidomos Dukagjini, njihet për kullat që tash konsiderohen objekte të trashëgimisë kulturore. Disa prej këtyre kullave të vjetra, me qindra vjet, i kanë mbijetuar edhe kohës edhe luftës, por shumë prej tyre ishin shkatërruar. Por kullat ndër vite kanë pasur edhe përkujdesje institucionale. Tash së fundmi, institucionet qendrore dhe lokale kanë rivitalizuar një kullë në Voksh.
E vjetër rreth 250-300 vjet, kulla e Azem Ramës në Voksh është ndër të paktat objekte trashëgimore në komunën e Deçanit e cila i mbijetoi jo vetëm shkatërrimeve masive gjatë luftës së fundit por edhe kohës.
“Edhe në Voksh ka qenë një numër i madh i kullave, diku afër 20 sosh, sidomos dy dhe trekatëshe. Mirëpo fatkeqësisht pothuajse të gjitha armiku me eskortat e veta i ka granatuar sikurse që po shihet kjo e jona, ka qenë balli përpara totalisht i granatuar edhe arriti siç po e shihni me qenë në këtë gjendje”, tha Sadri Lokaj, pronar i kullës.
Mundesh me e lexu edhe…
Por kjo kullë tani ka marrë pamje tjetër falë rivitalizimit.
“Ndoshta nuk mund të gjej fjalor të përshtatshëm me e treguar kontributin që e ka dhënë edhe ministria edhe drejtoria rajonale e trashëgimisë kulturore në Pejë me u revitalizuar kjo kullë, prandaj ju jemi mjaft mirënjohës ndaj tyre”, shtoi Lokaj.
Rivitalizimin e kësaj kulle në Voksh, por edhe të objekteve të tjera të trashëgimisë, e kanë mirëpritur edhe zyrtarët deçanas dhe ekspertët e kësaj fushe.
“Jo pa qëllim e përgëzoj familjen Lokaj që kanë arritur të ken durim, të presin me mirëkuptim organet zyrtare të intervenojnë. Ka edhe raste të tjera ku mund të intervenohet por janë të pakta. Unë bëj apel që organet zyrtare kompetente qendrore të kenë një vëmendje më të qartë drejt trashëgimisë kulturore, jo vetëm të restaurohen, të renovohen, por edhe të shfrytëzohen në formën më të mirë të mundshme në bashkëpunim e mirëkuptim me familjet pronare”, deklaroi për RTK Bekim Vishaj, drejtor i Muzeut Etnologjik në Deçan.
Aktualisht janë duke u rindërtuar edhe shumë kulla të tjera në rajone të ndryshme të vendit, si: kulla e Gecaj në Deçan, ajo e Bashor Pren Gegajt në Istog, Naser Thaçit në Han të Elezit, e po ashtu në Gjakovë; kullat Dobruna Poloshka, e Shahin Dulës dhe ajo e Tahsun Beut. /Katror.info
