Këngëtari i famshëm britanik, Robbie Williams ka ndarë një rrëfim të ndjerë dhe të sinqertë me ndjekësit e tij në Instagram, ku flet për presionet e mëdha që vijnë me famën, veçanërisht në momentet kur fansat kërkojnë selfie pa marrë parasysh rrethanat apo gjendjen e tij emocionale.
Artisti 51-vjeçar, i njohur si një nga figurat më ikonike të muzikës pop dhe ish-anëtar i grupit “Take That”, tregoi se një fluturim i fundit u kthye në një përvojë të vështirë për të, pasi u përball me kërkesa të vazhdueshme për fotografi.
Ai shpjegoi se, ndonëse përpiqet ta fshehë ankthin e tij, ndonjëherë situatat e tilla e kaplojnë emocionalisht, shkruan DailyMail.
Mundesh me e lexu edhe…
“Një selfie do të më shkaktonte shumë ankth, sepse menjëherë do të tërhiqte vëmendjen e gjithë kabinës. Do të fillonin të më njohin dhe kjo më fut në panik”, tha ai, ndërsa theksoi se në atë moment kishte pak gjumë dhe po përpiqej të kujdesej për katër fëmijët e tij.
Robbie tregoi se një fans i kishte lënë një shënim të bukur për dokumentarin e tij në Netflix, por që më pas pasuan edhe shumë të tjerë dhe kërkesa për fotografi nuk ndaluan. Kjo e çoi këngëtarin drejt një reflektimi të thellë mbi famën dhe pritshmëritë e publikut.
“Ka një ligj të pashkruar për njerëzit e famshëm: duhet të jesh gjithmonë i buzëqeshur, i sjellshëm, i aksesueshëm – si kryetari i qytetit më mikpritës në botë. Duhet të plotësosh çdo dëshirë që të kërkohet, çfarëdo qoftë ajo”.
Megjithatë, Robbie thekson se të famshmit janë njerëz si çdo kush tjetër – me halle, ndjenja dhe ditë të vështira. Ai u bëri thirrje fansave që të kenë më shumë mirëkuptim dhe të mos harrojnë se edhe ata kanë të drejtën për privatësi.
“Mund të jem në telefon me mamanë time, të flas për problemet e saj të shëndetit mendor, apo të mendoj për babain tim që vuan nga Parkinsoni. Edhe ne kemi gjëra që na rëndojnë”, shkroi ai.
Duke e përmbyllur mesazhin me mirënjohje, Robbie u shpreh: “Nuk po ankohem. Thjesht më duhej ta nxirrja nga vetja. Ju kam lejuar në pjesë të jetës sime që ndoshta nuk duhet, por shpresoj që edhe këtë ta pranoni me dhembshuri.”
Deklarata e tij u prit me vlerësime dhe mbështetje nga kolegë të njohur si Adam Lambert, Aimee Lou Wood, Claire Richards dhe Paris Hilton, të cilët e falënderuan për sinqeritetin dhe guximin për të folur hapur për këtë anë më pak të ndriçuar të famës./Katror.info
Përgatiti:
